मुख्यमंत्री श्री विष्णु देव साय के हुकुम म लकवा ले पीड़ित महिला ल तुरते मंजूर होइस 5 लाख रुपिया

मुख्यमंत्री आर्थिक सहायता योजना ले मदद राशि के मिलिस तत्काल स्वीकृति
रायपुर, मुख्यमंत्री श्री विष्णु देव साय के संवेदनशील पहल ले मुख्यमंत्री जनदर्शन म आज महासमुंद जिला के बसना विकासखंड के गांव बड़ेटेमरी के रहइया श्रीमती बसंती साव ल मुख्यमंत्री आर्थिक सहायता योजना के तहत 5 लाख रुपिया के आर्थिक मदद राशि के तुरते स्वीकृति मिलिस।
श्रीमती बसंती साव ह बताइस के ओकर दूनो गोड़ लकवा (पैरालिसिस) ले प्रभावित हे, ओकर इलाज रायपुर के एम्स, मेकाहारा अउ एक ठी निजी अस्पताल म हो चुके हे। इलाज अभी घलोक सलग चलत हे। एकर सेती ओ ल भारी परेशानी के सामना करे ल परत हे। आघू के इलाज बर लगभग 6 लाख 40 हजार रुपिया के खरचा होही। घर के माली हालत खराब होए अउ गरीब परिवार ले होए के सेती ओकर बर इलाज के खरचा उठाना संभव नइ हे। ओकर घरवाला श्री प्रेमकुमार साव ह बताइस के मुख्यमंत्री जनदर्शन म अपन पीरा (दुख) बताए के बाद ओ मन ल तुरंत मदद मिलिस। ओ मन ह मुख्यमंत्री के संवेदनशीलता के बड़ प्रशंसा करत आर्थिक मदद के तुरते मंजूरी बर आभार जताइन।
मुख्यमंत्री श्री साय ह जनदर्शन के बेरा म श्रीमती बसंती साव के आवेदन ल गंभीरता ले देखिन अउ ओकर हालत ल समझत संबंधित अधिकारी मन ल तुरते निर्देश दीन, ताकि बिना कोनो देरी के मदद मिल सकय। मुख्यमंत्री के निर्देश म सहायता राशि के तत्काल मंजूरी दे गीस। एकर ले पहिले घलोक मुख्यमंत्री के पहल म ओ मन ल 25 हजार रुपिया अउ 50 हजार रुपिया के आर्थिक मदद देहे जा चुके हे।