युवा संसद म डॉ. रमन सिंह बनिन अध्यक्ष अउ लइका मन बनिन सांसद, लोकहित के मुद्दा मन ऊपर होइस चर्चा
यूथ पार्लियामेंट म दिखिस भविष्य के नेतृत्व के सशक्त झलक
रायपुर, नेशनल रोवर – रेंजर जंबूरी के आयोजन पूरा उत्साह, अनुशासन अउ जीवंत सहभागिता के संग बालोद जिला के गांव दुधली म होवत हे। आयोजन के तीसरइया दिन जंबूरी परिसर लोकतांत्रिक चेतना के केंद्र बन गिस, जब रोवर-रेंजर अउ उपस्थित नागरिक मन ल लोकसभा के असली कार्यवाही के सीधा अउ व्यावहारिक अनुभव कराय गीस। यूथ पार्लियामेंट के मंच म रोवर-रेंजर मन ह सांसद के भूमिका निभाइन, उहें विधानसभा के अध्यक्ष ह संसद के अध्यक्ष के भूमिका निभाइन। युवा मन ह जे आत्मविश्वास, विषय के समझ अउ मर्यादित गोठ-बात के तरीका देखाइन, वो देखे लायक रहिस। ये मंच आवइया बेरा के जनप्रतिनिधि मन ल गढ़े के सशक्त माध्यम बनिस।
अनुशासन अउ आत्मविश्वास के मिसाल बनिन रोवर–रेंजर
विधानसभा अध्यक्ष डॉ. रमन सिंह ह आयोजित युवा संसद ल सहरावत कहिन के यूथ पार्लियामेंट के बेरा म रोवर-रेंजर मन ह जसना आत्मविश्वास अउ अनुशासन के संग अपन भूमिका ल निभाय हवंय, ओखर ले देश के उज्ज्वल भविष्य के कल्पना साकार दिखथे। आज के युवा काली के हमर समाज के प्रतिनिधि आंय। इनकर खांध म हमर विरासत ल आगू ले जाय के जिम्मा हे, जेला वो मन बढ़िया ढंग ले निभाहीं, ए बात उपर हम जम्मो झन ल भरोसा हे। उन मन सबो के भागीदारी के तारीफ करत कहिन के अइसन आयोजन ले युवा मन म लोकतांत्रिक मूल्य, संसदीय परंपरा अउ जिम्मेदार नागरिकता के मजबूत नींव परथे।
ये मउका म स्कूली शिक्षा मंत्री गजेंद्र यादव ह घलो युवा मन ल प्रोत्साहित करत कहिन के आज के रोवर-रेंजर देश के आवइया भविष्य आंय। भारतीय स्काउट गाइड के मुख्य राष्ट्रीय आयुक्त डॉ. के. के. खंडेलवाल, राज्य मुख्य आयुक्त श्री इंद्रजीत सिंह खालसा, जिला मुख्य आयुक्त श्री राकेश यादव, कलेक्टर श्रीमती दिव्या उमेश मिश्रा, पुलिस अधीक्षक श्री योगेश कुमार पटेल सहित आन जनप्रतिनिधि, अधिकारी, रोवर-रेंजर, स्काउट-गाइड्स अउ बड़ संख्या म आम नागरिक उपस्थित रहिन।
सीख, सेवा अउ साहस ले भरे रिहिस तीसरा दिन
जंबूरी के तीसरइया दिन प्रतिभागी मन बर आनी-बानी के अउ प्रेरक गतिविधि के आयोजन करे गीस। जागरण अउ शारीरिक जांच के संग फ्लैग सेरेमनी म अनुशासन अउ एकता के संदेश दे गीस। डॉग शो म कुत्ता (कुकुर) मन के बेहतरीन कलात्मक प्रदर्शन के संग मार्च पास्ट प्रतियोगिता घलो आयोजित होइस। स्वच्छ भारत अभियान ले जुड़े प्रतियोगिता मन म घलो युवा मन ह चढ़-बढ़ के हिस्सा लेवत सामाजिक दायित्व मन के प्रति जागरूक करिन।
आज जम्बूरी म आदिवासी संस्कृति परंपरा के संग आधुनिकता के अनोखा प्रस्तुति दे गीस। आदिवासी वेशभूषा म पारंपरिक व्यंजन बनाय के संग लोकवाद्य मन के घलो प्रस्तुति करे गीस। आदिवासी नृत्य अउ सांस्कृतिक प्रस्तुति के बीच पारंपरिक भोजन के संग हॉर्स राइडिंग, बाइक रेस अउ वाटर एक्टिविटी जइसन साहसिक गतिविधि के घलो प्रदर्शन करे गीस।
युवा मन ल आपदा प्रबंधन अउ ग्लोबल डेवलपमेंट विलेज ले जुड़े प्रतियोगिता के संग वृक्षारोपण घलो कराय गीस। आगू कंटीजेंट लीडर मीटिंग, प्रश्नोत्तरी प्रतियोगिता, एच डब्लू बी रीयूनियन, नाइट हाईक तथा पायोनियरिंग प्रोजेक्ट प्रतियोगिता के घलो आयोजन करे जाही। एरिना म आयोजित इंटरनेशनल नाइट कार्यक्रम म अलग-अलग संस्कृति के रंगारंग प्रस्तुति ले जंबूरी ल अंतरराष्ट्रीय स्वरूप प्रदान करे जाही।
