बालोद के ग्राम दुधली म पहिली राष्ट्रीय रोवर-रेंजर जंबूरी के भव्य अउ ऐतिहासिक समापन
बालोद, स्काउट जीवन जिये के एक ठन पद्धति आय, जेन मनखे ला कठिन समय म घलो अपन गोड़ म खड़े होना, टीम भावना ले काम करना अउ समाज बर समर्पित रहना सिखाथे। मुख्यमंत्री श्री विष्णुदेव साय ह आज बालोद जिला के ग्राम दुधली म आयोजित पहिली राष्ट्रीय रोवर-रेंजर जंबूरी के भव्य समापन समारोह ला मुख्य अतिथि के रूप म संबोधित करत ये बात कहिन।
मुख्यमंत्री श्री साय ह देस के अलग-अलग राज्य ले आए रोवर-रेंजर अउ स्काउट-गाइड मन के भगवान श्रीराम के ननिहाल अउ माता शबरी के तपोभूमि छत्तीसगढ़ म मया-दुलार ले स्वागत करत उंकर उज्ज्वल भविष्य के कामना करिन। उमन कहिन के ये जंबूरी केवल एक ठन आयोजन नो हे, भलुक भारत के विविधता म एकता के जिउत जागता तिहार आय।
‘एक भारत-श्रेष्ठ भारत’ के झलक बनिस राष्ट्रीय जंबूरी
मुख्यमंत्री श्री साय ह कहिन के देस म पहिली पइत अतेक बड़े स्तर के राष्ट्रीय रोवर-रेंजर जंबूरी के आयोजन होना अउ ओखर बर छत्तीसगढ़ के चयन होना पूरा राज्य बर गौरव के बात आय। ये आयोजन प्रधानमंत्री श्री नरेंद्र मोदी के ‘एक भारत-श्रेष्ठ भारत’ के भावना ला साकार करथे। उमन कहिन के अलग-अलग राज्य के रोवर-रेंजर मन ह सांस्कृतिक प्रस्तुति, झांकी अउ गतिविधि मन के माध्यम ले भारत के समृद्ध विविधता ला बड़ सुग्घर ढंग ले प्रस्तुत करिन।
युवा ही राष्ट्र के भविष्य, स्काउटिंग ले मिलथे नेतृत्व के शक्ती
मुख्यमंत्री श्री साय ह युवा मन ला संबोधित करत कहिन के युवा ही राज्य अउ देस के भविष्य आंय। उमन स्वामी विवेकानंद के प्रेरक वाक्य –”उठो, जागो अउ तब तक झन रुको जब तक लक्ष्य प्राप्त न हो जाए” – के उल्लेख करत युवा मन ला आत्मविश्वास अउ संकल्प के साथ आगू बढ़े के आह्वान करिन।
उमन कहिन के स्काउट-गाइड संगठन कोति ले सिखाए गे अनुशासन, सेवा-भाव, नेतृत्व अउ टीमवर्क जइसन गुण युवा मन ला राष्ट्र निर्माण बर तइयार करथे। मुख्यमंत्री ह कोरोना काल म स्काउट-गाइड्स द्वारा करे गे सेवा काम के बड़ाई करत कहिन के उमन समाज ला जागरूक अउ सुरक्षित रखे म बड़ महत्व के भूमिका निभाइन। ये मौका म मुख्यमंत्री श्री साय ह प्रधानमंत्री श्री नरेंद्र मोदी के ‘बाल विवाह मुक्त भारत अभियान’ के तहत उपस्थित युवा मन ला शपथ घलो देवाइन।
15 हजार ले जादा रोवर-रेंजर मन के सहभागिता ले ऐतिहासिक बनिस जंबूरी
09 ले 13 जनवरी तक चलिस ये पांच दिवसीय जंबूरी म देस-विदेस ले 15 हजार ले जादा रोवर-रेंजर मन ह भाग लीन। समापन समारोह के बेरा देसभर ले आए प्रतिभागी मन डहर ले प्रस्तुत सांस्कृतिक कार्यक्रम मन ह पूरा माहौल ला भारतीय कला, संस्कृति अउ भाईचारा ले सराबोर कर दीस। विशाल जनसैलाब के उपस्थिति ह ये आयोजन ला ऐतिहासिक बना दीस।
स्कूल शिक्षा मंत्री अउ स्काउट-गाइड के राज्य अध्यक्ष श्री गजेंद्र यादव ह कहिन के मुख्यमंत्री श्री साय के मार्गदर्शन म ये राष्ट्रीय जंबूरी सफलता के साथ पूरा होइस। उमन बताइन के जंबूरी के दौरान युवा संसद, कौशल प्रदर्शन, सांस्कृतिक आदान-प्रदान अउ आदिवासी एथनिक फैशन शो जइसन कार्यक्रम मन ह युवा मन ला नई दृष्टि अउ मंच प्रदान करिस।
ये मौका म स्कूल शिक्षा मंत्री श्री यादव ला राष्ट्रीय मुख्य आयुक्त डॉ. के. के. खंडेलवाल द्वारा सिल्वर एलीफेंट अवार्ड ले सम्मानित करे गीस।
सेवा, समर्पण अउ सहभागिता ले बनही श्रेष्ठ भारत
भारतीय स्काउट-गाइड के राष्ट्रीय मुख्य आयुक्त डॉ. के. के. खंडेलवाल ह कहिन के स्काउटिंग के मूल मंत्र आय –“अपन काम ले दूसर के भला करना।” उमन कहिन के परंपरा अउ आधुनिकता के संतुलन अउ सेवा-भाव ही एक सशक्त अउ विकसित राष्ट्र के नींव रखथे।
ये मौका म छत्तीसगढ़ राज्य बीज निगम के अध्यक्ष श्री चंद्रहास चंद्राकर, छत्तीसगढ़ मछुआ कल्याण बोर्ड के अध्यक्ष श्री भरत मटियारा सहित अन्य गणमान्य नागरिक अउ जनप्रतिनिधि उपस्थित रिहिन।
