अजिरमा के श्रीमती कुमुदनी ल मिलिस सुरक्षित आशियाना, जीवन म आइस सम्मानजनक बदलाव
अंबिकापुर, प्रधानमंत्री आवास योजना ग्रामीण छत्तीसगढ़ के हजारो जरूरतमंद परिवार मन बर उम्मीद के किरण बनके उभरे हे। राज्य म तेजी ले लागू करे जात ए महत्वाकांक्षी योजना ह ओ परिवार मन के जीवन ल बदले बर शुरू कर दे हे, जेन मन अब तक कच्चा घर म रहत मौसम के मार अउ असुरक्षा के सामना करत रहिन्।
सरगुजा जिला के अंबिकापुर विकासखंड के ग्राम पंचायत अजिरमा के श्रीमती कुमुदनी ल घलो ए योजना ले लाभ मिले हे। ओकर नवा पक्का घर बनके तियार हो गे हे, जेकर ले ओकर परिवार ह राहत के सांस लेहे हे। एकर ले पहिली ओ मन कच्चा मकान म रहत रहिन् जिहां गर्मी, जाड़ा अउ बरसात के समय कई प्रकार के तकलीफ झेले ल परत रहिस।
श्रीमती कुमुदनी ह बताईस के आर्थिक कमजोरी के सेती पक्का घर बनाना संभव नइ रहिस। फेर प्रधानमंत्री आवास योजना ग्रामीण के तहत मिले प्रोत्साहन राशि ह ओकर सपना ल सच कर दीस। शासन ले मिले सहायता अउ अपन बचत ल जोड़के उमन अपन परिवार बर एक ठन सुरक्षित, मजबूत अउ सम्मानजनक आवास (घर) तियार करीन्।
उमन प्रधानमंत्री श्री नरेन्द्र मोदी अउ छत्तीसगढ़ के मुख्यमंत्री श्री विष्णुदेव साय के प्रति आभार जतावत कहिन् के ए योजना सही म गरीब परिवार मन के जीवन म बदलाव लावत हे। पक्का मकान मिले ले अब ओकर परिवार हर मौसम म सुरक्षित हे अउ सामाजिक मान-सम्मान घलो बाढ़े हे।
जानबा हे के प्रधानमंत्री आवास योजना ग्रामीण के तहत छत्तीसगढ़ सरकार कोति ले आवासहीन परिवार मन, कच्चा झोपड़ी म रहवइया ग्रामीण मन अउ प्राथमिकता श्रेणी के हितग्राही मन ल पक्का आवास उपलब्ध कराये जात हे। योजना के बढ़िया ढंग ले लागू होय ले प्रदेश के अलग-अलग जिला मन म हजारो परिवार पक्का घर म रहे के मउका पावत हें, जेकर ले ग्रामीण जीवन, आत्मविश्वास अउ रहन-सहन म बड़े बदलाव महसूस होवत हे।
