दिव्यांगजन स्वरोजगार योजना मन ले आत्मनिर्भरता के रद्दा म मजबूत कदम

रायपुर/गरियाबंद, छत्तीसगढ़ दिव्यांगजन वित्त अऊ विकास निगम, रायपुर डहर ले चलाय जात स्वरोजगार प्रोत्साहन योजना मन प्रदेश के दिव्यांगजन मन ल आर्थिक रूप ले मजबूत अऊ आत्मनिर्भर बनाय म बड़का भूमिका निभावत हे। निगम डहर ले देहे गे करजा अऊ अनुदान सहायता ले कतको दिव्यांगजन मन सफलतापूर्वक अपन व्यवसाय खड़ा कर के सम्मान वाला रोजी-रोटी कमावत हवंय।
रायपुर जिला के गांव खेखरूट के रहवइया श्री महावीर यादव ल साल 2013 म कपड़ा व्यवसाय अऊ सिलाई काम बर 80,750 रूपिया के करजा देहे गे रहिस। श्री यादव ह करजा के राशि ल तय समय म ब्याज समेत जमा करिस अऊ निगम के अनुदान योजना के घलो लाभ लीस। अभी ओ ह कपड़ा व्यवसाय अऊ सिलाई काम के माध्यम ले हर महीना लगभग 20,000 रूपिया के आमदानी कमा के अपन परिवार के बढ़िया ढंग ले पालन-पोषण करत हवंय।

अइसने गरियाबंद जिला के गांव मोंडी (किंशवर रोड) के रहवइया श्रीमती सुनीता साहू ल साल 2025–26 म हर्बल साबुन अऊ फिनाइल व्यवसाय बर 50,000 रूपिया के करजा दे गीस। ए मदद ले ओ ह अपन व्यवसाय ल बढ़िया ढंग ले चलावत हवंय अऊ आत्मनिर्भर बनके अपन अऊ अपन परिवार के आर्थिक जरूरत मन ल पूरा करत हवंय।
ए सफल उदाहरण मन ले साफ हे के समाज कल्याण विभाग अऊ छत्तीसगढ़ दिव्यांगजन वित्त अऊ विकास निगम के योजना मन दिव्यांगजन मन ल स्वरोजगार के माध्यम ले मजबूत बनावत ओ मन ल आत्मसम्मान के संग जिनगी बसर करे के मौका देवत हे।