ऑटो एक्सपो–2026: गाड़ी बिसाए म आरटीओ टैक्स म 50 प्रतिशत के छूट

रायपुर, छत्तीसगढ़ म परिवहन विभाग डहर ले जारी सूचना के मुताबिक रायपुर ऑटोमोबाइल डीलर्स एसोसिएशन कोति ले 20 जनवरी 2026 ले 05 फरवरी 2026 तक श्री राम बिजनेस पार्क, एमजीएम हॉस्पिटल के आघू, विधानसभा रोड, सड्डू रायपुर म ऑटो एक्सपो–2026 के आयोजन करे जावत हे।
ए ऑटो एक्सपो म बिकइया गाड़ी मन ऊपर परिवहन विभाग डहर ले एकमुश्त 50 प्रतिशत आरटीओ टैक्स म छूट दे जात हे, जेखर ले प्रदेश के आम जनता ल भारी आर्थिक फायदा मिलही।
ऑटो एक्सपो–2026 के आयोजन 20 जनवरी 2026 ले 05 फरवरी 2026 तक श्री राम बिजनेस पार्क, रायपुर म होवत हे। ए बेरा म गाड़ी बिसईया ग्राहक मन ल आरटीओ टैक्स म 50 प्रतिशत के छूट के सीधा लाभ मिलही।
ए हा प्रदेश के पहिली अइसन ऑटो एक्सपो हरे, जेमा पूरा छत्तीसगढ़ के आम जनता ल फायदा मिलही। गाड़ी बिसाए बर आम जनता ल रायपुर आए के जरूरत नइ पाही, बल्कि ओ मन अपन शहर या गांव के सबले नजीक के प्रतिभागी/रजिस्टर्ड डीलर मन के माध्यम ले ए योजना के लाभ ले सकहीं।
ऑटो एक्सपो–2026 के अंतर्गत सबो नागरिक मन ल अपन गृह जिला म ही गाड़ी के रजिस्ट्रेशन कराए के सुविधा मिलही। यानी कि, बिसाए गए गाड़ी ऊपर अपन गृह जिला के परिवहन ऑफिस के रजिस्ट्रेशन नंबर (आरटीओ कोड) मिल सकही।
दूरिहा इलाका के डीलर मन घलो ए ऑटो एक्सपो म भाग लेवत हें, जेखर ले छोटे व्यावसायिक विक्रेता मन ल रोजगार के सही मउका मिलही अउ स्थानीय व्यापार ल बढ़ावा मिलही।
रायपुर ऑटो एक्सपो म छत्तीसगढ़ के जनता ल एके जगा म सबो प्रकार के गाड़ी मॉडल अउ नवा तकनीक ले लेस नवा मॉडल मन ल देखे, परखे अउ चुने के मउका मिलही। एकर ले आम जनता ल नवा ऑटोमोबाइल तकनीक के जानकारी घलो मिल सकही।
रायपुर ऑटो एक्सपो–2026 म देश के अलग-अलग फाइनेंसर अउ बैंक कम से कम ब्याज दर म गाड़ी बर लोन देवत हें, उहें इंश्योरेंस कंपनी मन घलो कम दर म गाड़ी के बीमा के सुविधा देवत हें। जेखर ले गाड़ी बिसईया नागरिक मन ल अउ जादा आर्थिक फायदा होही।
ऑटो एक्सपो–2026 म आरटीओ टैक्स म 50 प्रतिशत छूट के संगे-संग फाइनेंस कंपनी, बैंक, इंश्योरेंस कंपनी अउ अलग-अलग डीलर मन के बीच म प्रतिस्पर्धा के सेती कम दाम म गाड़ी मिलही, जेखर ले आम जनता ल भारी आर्थिक राहत मिलही।
रायपुर के ए ऑटो एक्सपो म रायपुर जिला के 95 डीलर अउ अउर जिला के 171 डीलर, कुल मिलाके 266 डीलर मन भाग लेवत हें, जेखर ले प्रदेशभर के नागरिक मन ल बहुत अकन विकल्प मिलही।
बता देवन के पउर साल 2025 के ऑटो एक्सपो म कुल 29,348 गाड़ी मन के बिक्री होए रहिस, जेखर माध्यम ले आम जनता ल लगभग 120 करोड़ रुपया के आरटीओ टैक्स म छूट दे गए रहिस, जेखर ले लोगन ल भारी आर्थिक मदद मिले रहिस।
ए प्रकार ले, ऑटो एक्सपो–2026 प्रदेश के नागरिक मन बर किफायती दर म गाड़ी बिसाए, स्थानीय स्तर म रजिस्ट्रेशन सुविधा पाए अउ भारी आर्थिक लाभ उठाए के एक ठिन महत्वपूर्ण मउका साबित होवत हे।