पहिली चरण म महासमुंद के बेटी कु. सृष्टि साहू के होइस चयन
राज्य म पंजीयन ल लेके उत्साह ले भरे भागीदारी
रायपुर, परीक्षा उपर चर्चा के नवां संस्करण म ए साल घलो विद्यार्थी, पालक अउ शिक्षक मन म भारी उत्साह देखे बर मिलिस। पंजीयन के आखिरी तारीख 11 जनवरी 2026 तक छत्तीसगढ़ राज्य ले कुल 29.29 लाख प्रतिभागी मन ह पोर्टल म अपन पंजीयन कराइन। ए आंकड़ा पउर साल के मुकाबला म 7.16 लाख जादा हे, जेन कार्यक्रम के प्रति बढ़त रुचि ल देखावत हे।
गय बछर पंजीयन के मामला म छत्तीसगढ़ देश म पहिली नंबर म रहिस, जब कि ए बछर अंडमान अउ निकोबार, चंडीगढ़ अउ लक्षद्वीप के बाद राज्य ल चौथा स्थान मिले हे। खास बात ये हे के ए बछर राज्य ले 1.41 लाख पालक मन डहर ले पंजीयन करे गीस, जेन लइका मन के पढ़ाई-लिखाई के प्रति पालक मन के बढ़त जागरूकता के साफ संकेत हरे।
पहिली चरण के चयन प्रक्रिया
पहिली चरण म विद्यार्थी मन के चयन बर जिला मन ले विद्यार्थी मन डहर ले पूछे गए सवाल ले संबंधित वीडियो मंगाए गए रहिस। तय तारीख तक कुल 171 विद्यार्थी मन के वीडियो मिलिस। बनाए गए समिति ह ए वीडियो मन के गहिर जांच करिस, जेखर बाद 18 विद्यार्थी मन के चयन करके उंकर जानकारी केंद्र ल भेजे गीस। चुने गए विद्यार्थी मन म पीएमश्री स्कूल ले 04, सेजस (SEJES) ले 06, निजी स्कूल ले 04, शासकीय स्कूल ले 03 अउ केजीबीव्ही (KGBV) ले 01 विद्यार्थी सामिल हें।
कु. सृष्टि साहू के केंद्रीय स्तर म चयन
केंद्र के समिति डहर ले महासमुंद जिला के स्वामी आत्मानंद स्कूल, नयापारा के गणित संकाय की कक्षा 12वीं के छात्रा कु. सृष्टि साहू के चयन करे गए हे। कु. सृष्टि साहू, पिता श्री नरेन्द्र कुमार साहू अउ माता श्रीमती दिनेश्वरी साहू ल 21 जनवरी 2026 ल दिल्ली म आयोजित परीक्षा पे चर्चा कार्यक्रम म सामिल होए बर नेवता देहे गए हे।
प्रशासन अउ शाला परिवार के प्रतिक्रिया
कु. सृष्टि साहू के चयन म जिला कलेक्टर श्री विनय कुमार लंगहे ह ओखर ले भेंट कर बधाई अउ शुभकामना दीन। स्कूल के प्राचार्या श्रीमती अमी रूफस ह ए उपलब्धि म खुसी जतावत बताइन के कु. सृष्टि एक अनुशासित, मेहनती अउ पढ़ाकू छात्रा हरे। ओ मन ए घलो बताइन के कु. सृष्टि बाल दिवस के मउका म शाला नायक के भूमिका म प्राचार्य के कुर्सी म बइठ के नेतृत्व प्रदान कर चुके हे।
परिवार के गर्व अउ सहयोग
कु. सृष्टि साहू के पिता शासकीय स्कूल म शिक्षक हें अउ दाई गृहणी हें। दूनो ह अपन बेटी के चयन म गर्व अउ खुसी जताए हें अउ एला परिवार के संग-संग जिला बर घलो गौरव के विषय बताए हें।
शाला अउ विभागीय प्रयास के सराहना
शाला प्राचार्य के मुताबिक स्कूल के सबो शिक्षक मन डहर ले परीक्षा पे चर्चा म विद्यार्थी मन के पंजीयन बर विशेष प्रयास करे गीस। स्कूल म 100 प्रतिशत पंजीयन पक्का करे गीस अउ विद्यार्थी मन ल लगातार अभ्यास घलो कराए गीस, जेखर सकारात्मक परिणाम आघू आए हे।
कु. सृष्टि साहू के चयन म जिला शिक्षा अधिकारी श्री विजय कुमार लहरे अउ शिक्षा विभाग डहर ले गाड़ा-गाड़ा बधाई दे गीस। छात्रा के दिल्ली जाए ले संबंधित जरूरी बेवस्था ल समय-सीमा म पूरा कराए म जिला परियोजना समन्वयक श्री रेखराज शर्मा के महत्वपूर्ण भूमिका रहिस। उहें राज्य परियोजना कार्यालय, समग्र शिक्षा रायपुर डहर ले घलो महासमुंद जिला ल ए उपलब्धि बर शुभकामना भेजे गए हे।
आघू के चरण के अगोरा
परीक्षा पे चर्चा 2026 के आघू के चरण मन म अउ विद्यार्थी मन के चयन के प्रक्रिया जारी हे, जेखर परिणाम के अगोरा करे जात हे।
