बलौदाबाजार-भाटापारा, प्रधानमंत्री आवास योजना ग्रामीण (PMAY-G) केंद्र सरकार कोति ले शुरू करे गए एक आवास योजना हरे, जेकर उद्देश्य गाँव के बेघर नागरिक मन ल पक्का मकान देना हे। ए योजना के तहत कच्चा मकान म रहइया या बिना छत वाले परिवार मन ल पक्का मकान बनाय बर आर्थिक सहायता देहे जाथे, जेमा सबो जरूरी सुविधा मिलथे।
बलौदाबाजार-भाटापारा जिला के उपलब्धि मन के लिस्ट म एक अउ कामयाबी जुड़ गे हे। जिला ह प्रधानमंत्री आवास योजना (ग्रामीण) अंतर्गत एक बड़े उपलब्धि हासिल करे हे। साल 2025-26 के लक्ष्य मन ल पूरा करे म बलौदाबाजार-भाटापारा जिला पूरा छत्तीसगढ़ राज्य म पहिली स्थान म हे।
बलौदाबाजार-भाटापारा जिला के कलेक्टर के मार्गदर्शन अउ सीईओ जिला पंचायत के नेतृत्व म जिला ह न केवल आवास मन के स्वीकृति म तेजी देखाए हे, बल्कि जमीनी स्तर म निर्माण काम शुरू करे म घलोक रिकार्ड बनाय हे।
साल 2025-26 म कुल 26843 आवास मंजूर करे गए हे जेमा 24 हजार 313 आवास मन बर पहिली किश्त जारी, 20 हजार 480 आवास के निर्माण शुरू हो गे हे अउ 15 हज़ार 120 आवास प्लिंथ (नेव) स्तर तक पूरा हो गे हे।
सबले जादा प्लिंथ निर्माण
बलौदाबाजार-भाटापारा जिला म 15 हजार 120 आवास मन के प्लिंथ स्तर तक के काम पूरा हो चुके हे, जेन राज्य के कोनो भी जिला के तुलना म सबले जादा हे। 26 हजार 439 आवास मन के एफटीओ करे जा चुके हे जेमा ले 24 हजार 313 हितग्राही मन के खाता म पहिली किश्त के सफलतापूर्वक हस्तांतरण करे जा चुके हे।
कुल मंजूर आवास मन म ले 20 हजार 480 मकान मन म काम शुरू हो जाना अउ 139 आवास पूरा होना प्रशासन के मुस्तैदी अउ गाँव वाले मन के उत्साह ल देखाथे। पीएम जनमन योजना अंतर्गत घलोक जिला म प्राथमिकता से काम करा के 25 पात्र हितग्राही मन के आवास मंजूर कर सबो के शत-प्रतिशत आवास पूरा करा ले गे हे।
रेनवाटर हार्वेस्टिंग संरचना निर्माण
जिला ल जल संचयन म देश म दूसरा पुरुस्कार मिले हे जेमा प्रधानमंत्री आवास योजना ग्रामीण के हितग्राही मन के विशेष योगदान रहे हे। आवास योजना के अंतर्गत पूरा होय आवास मन म 15 हजार 260 रेन वाटर हार्वेस्टिंग संरचना के निर्माण कराय गे हे।
ए उपलब्धि ले जिला के हजारो परिवार मन के अपन पक्का घर के सपना अब हकीकत म बदलत हे। ए ह न केवल ग्रामीण विकास ल गति देवत हे, बल्कि स्थानीय स्तर म रोजगार के अवसर घलोक पैदा करत हे।
