मुख्यमंत्री श्री साय ह कुरूसनार ले बस म यात्री मन के संग करिन सफर
मुख्यमंत्री बस सेवा के तहत दूरस्थ अंचल के लोगन मन ल मिलत हे परिवहन सुविधा
नारायणपुर, राज्य के दूरस्थ अउ सीमांत आदिवासी अंचल मन ल मुख्यधारा ले जोड़े बर एक ठी महत्वपूर्ण पहल के रूप म छत्तीसगढ़ सरकार कोति ले शुरू करे गे मुख्यमंत्री बस सेवा अब नारायणपुर जिला म सफलतापूर्वक चलत हे। मुख्यमंत्री श्री विष्णु देव साय ह जिला के प्रवास के दौरान कुरूसनार ले लगभग 4 किमी तक ग्रामीण मन के संग बस म यात्रा करिन।
मुख्यमंत्री के बस सेवा ले सफर करना ए योजना के विश्वसनीयता अउ जनोन्मुखी सोंच ल रेखांकित करथे। उमन अपन संग म सफर करइया यात्री मन ले अब ए नक्सल प्रभावित इलाका म बस सेवा शुरू होय ले होय फायदा के बारे म घलोक ग्रामीण मन ले पूछिन। मुख्यमंत्री के ए दौरा अउ बस सेवा ले करे गे सफर ल नारायणपुर जिला म विकास, विश्वास अउ सुशासन के दिशा म एक ठी सशक्त संदेश के रूप म देखे जावत हे।
अभी नारायणपुर जिला म मुख्यमंत्री बस सेवा के अंतर्गत चार ठन बस चलत हे, जेमा ले तीन ठन बस नियद नेल्ला नार मार्ग म नियमित परिवहन सेवा देवत हे। ए बस मन उही क्षेत्र म आवागमन के सुविधा उपलब्ध करावत हे, जेन बीते एक दशक ले माओवादी उग्रवाद के सेती सार्वजनिक परिवहन ले लगभग वंचित रहिन।
पहिला मार्ग नारायणपुर-नेलंगूर के हे, जेकर अंतर्गत डूमरतराई, कुकडाझोर, आंकाबेडा, कस्तूरमेटा, मोहंदी, कोडलियार, कुत्तूल, बेडमाकोटी अउ नेलंगूर गांव ल लाभ मिलत हे। दूसर मार्ग नारायणपुर-कुतूल के हे, जेमा कच्चापाल, कोडलियार अउ कुतूल के संग कुरूषनार, बासिंग, कुन्दला, कोहकामेटा अउ इरकभट्टी गांव मन ल परिवहन सुविधा मिलत हे। तीसर मार्ग नारायणपुर-गारपा के हे, जेखर ले कुरूषनार, बासिंग, कुन्दला, सोनपुर, मसपुर अउ होरादी गांव ल लाभ मिलत हे।
ए बस सेवा सार्वजनिक-निजी भागीदारी (पीपीपी) मॉडल के तहत संचालित करे जात हे, जेमा संचालन के जिम्मेदारी एक निजी बस ऑपरेटर ल सौंपे गे हे, जबकि शासन कोति ले मार्ग के निर्धारण अउ निगरानी करे जात हे। ए पहल के मुख्य उद्देश्य सीमांत आदिवासी समुदाय मन ल विश्वसनीय, सुलभ अउ सुरक्षित परिवहन सुविधा उपलब्ध कराना, सामाजिक समावेशन ल बढ़ावा देना अउ क्षेत्र म आवागमन अउ कनेक्टिविटी ल मजबूत करना हे।
