नारायणपुर जिला ल मिलिस 351 करोड़ रूपिया के विकास काम मन के सौगात
लाल आतंक ले रूके विकास ल अब मिलत हे गति
आदिवासी संस्कृति अउ पारंपरिक विरासत मन ल सहेजे म बस्तर पण्डुम के महत्वपूर्ण योगदान
नारायणपुर, मुख्यमंत्री श्री विष्णुदेव साय बस्तर के नारायणपुर जिला के दू दिवसीय प्रवास म जिला मुख्यालय पहुंचिन, जिहां उमन अलग-अलग कार्यक्रम म शामिल होके जिलावासी मन ल कद ठो सौगात दीन। ए बेरा म मुख्यमंत्री ह हाई स्कूल मैदान म आयोजित बस्तर पण्डुम के जिला स्तरीय कार्यक्रम म 351 करोड़ 49 लाख 45 हजार रूपिया के 357 विकास काम मन के लोकार्पण अउ भूमिपूजन करिन। मुख्यमंत्री श्री साय ह ए मउका म विशाल जनसमूह ल संबोधित करत कहिन के छत्तीसगढ़ म लाल आतंक समाप्ति के कगार म हे, जेखर ले विकास ल गति मिलत हे। माओवाद के सेती ए क्षेत्र लंबा समय ले विकास ले अछूता रहिस, अब इहां नवाचार होवत हे।
नारायणपुर के हाई स्कूल मैदान म आयोजित आज मंझनिया संबोधित करत मुख्यमंत्री श्री साय ह आगू कहिन के प्रधानमंत्री श्री नरेन्द्र मोदी अउ केन्द्रीय गृह मंत्री श्री अमित शाह के दृढ़ संकल्प ले प्रदेश सरकार ह माओवाद मुक्त करे के सरलग उदीम करत हे। उमन बताइन के नियद नेल्लानार योजना के चलत बस्तर के 400 ले ज्यादा गांव मन म अलग-अलग योजना अउ गतिविधि के विकास के पहुंच पक्का होय हे। आत्मसमर्पित माओवादी मन ल समाज के मुख्यधारा ले जोड़े के दिशा म ओ मन ल कौशल उन्नयन प्रशिक्षण दे जावत हे, जेखर ले वो मन आजीविका पाके आत्मनिर्भर बन सकंय। संगेच बस्तर ल विकास के जम्मो आयाम ले जोड़े बर इहां पर्यटन विकास, खेती-किसानी, पशुपालन जइसे काम ल आगू बढ़ाए के संकल्प मुख्यमंत्री ह दोहराइन। श्री साय ह ए घलोक कहिन के आदिवासी संस्कृति अउ पारंपरिक विरासत मन ल सहेजे अउ संजो के रखे के उद्देश्य ले प्रदेश सरकार बस्तर पण्डुम के आयोजन करत हे। उमन उपस्थित लोगन मन ले जनजातीय सभ्यता अउ धरोहर के जड़ ले जुड़े रहे के आह्वान करिन।
मुख्यमंत्री ह करिन 332 करोड़ के छह निर्माण कार्य के घोषणा
ए बेरा म मुख्यमंत्री ह 06 ठी निर्माण कार्य के घोषणा करिन, जेखर अनुमानित लागत 332 करोड़ रूपिया हे। एमा 125 किलोमीटर लंबा रद्दा नारायणपुर के ओरछा-आदेर-लंका-बेदरे-कुटरूमैमेड जेखर लागत राशि-250 करोड़ रूपिया हे। ए ह नारायणपुर जिला ल बीजापुर जिला ले जोड़इया महत्वपूर्ण रद्दा हरय, जेमा जिला के भीतरी क्षेत्र के ईदवाया, एडजुम, आदेर, कुड़मेल, ढोढरीबेड़ा, जाटलूर, धोबे, डोडीमरका, पदमेटा, लंका जइसे गांव जुड़थे। अइसने राजनांदगांव-बैलाडीला मार्ग म सतह मजबूतीकरण काम के घोषणा करिन, एकर लंबाई 28 कि.मी. हे जउन लगभग 34 करोड़ ले तियार होही। ए ह नारायणपुर जिला ल दंतेवाड़ा जिला म जोड़े वाला महत्वपूर्ण रद्दा हरय। अइसने नारायणपुर-सोनपुर-मरोड़ा मार्ग म 28 किमी के सतह मजबूतीकरण काम के घोषणा (राशि-34 करोड़ 12 लाख) – ए रद्दा जिला ल महाराष्ट्र बार्डर तक जोड़इया महत्वपूर्ण रद्दा हरय, जेमा जिला के ब्रेहबेड़ा, कुरूषनार, बासिंग, सोनपुर गांव जुड़थे। एकर अलावा ब्रेहबेड़ा (नारायणपुर)-कंदाड़ी-कीहीकाड़-मुरनार-बेचा मार्ग म घुड़साल नाला म उच्चस्तरीय पुल वाला पहुंच मार्ग निर्माण कार्य, जेखर लंबाई 80 मीटर अउ लागत राशि-12 करोड़ 42 लाख हे। संगे नारायणपुर जिला अंतर्गत अबुझमाड़ के भीतरी क्षेत्र मन म शुरू करे गे 10 वैकल्पिक प्राथमिक शाला ‘घमण्डी, वाला, जटवर, नेलनार, रोहताड़, हितावाड़ा, मोडनार, तोके, कोडटामरका अउ कोडोली‘ के स्कूल सेटअप अउ भवन, अउ तोके म आश्रम शाला भवन के स्वीकृति के घोषणा करिन, जउन 01 करोड़ 06 लाख रूपिया ले तियार होही। अइसने जिला के एज्युकेशन हब, गरांजी म खेल मैदान के घोषणा करिन जेखर निर्माण 50 लाख रूपिया के लागत ले होही।
कार्यक्रम म वन मंत्री श्री केदार कश्यप ह अपन उद्बोधन म कहिन के प्रधानमंत्री श्री नरेन्द्र मोदी अउ केन्द्रीय गृह मंत्री श्री अमित शाह जी के सशक्त अउ निर्णायक नेतृत्व म 31 मार्च 2026 तक देश ले सशस्त्र माओवाद के आतंक के पूरा खत्मा हो जाही। नारायणपुर जिला घलोक जल्दी नक्सल मुक्त होके शांति, विकास अउ समृद्धि के रद्दा म लगातार आगू बढ़ही। उमन कहिन के मुख्यमंत्री श्री साय के कुशल नेतृत्व म छत्तीसगढ़ आज विकास के नवा ऊँचाई ल छूवत हे। सड़क, शिक्षा, स्वास्थ्य, खेल अउ बुनियादी सुविधा मन के विस्तार के माध्यम ले हर गांव, हर पारा ल मुख्यधारा ले जोड़े जात हे। राजस्व मंत्री अउ जिला के प्रभारी मंत्री श्री टंकराम वर्मा ह अपन उद्बोधन म कहिन के मुख्यमंत्री श्री साय ह जिला ल 351 करोड़ के विकास काम मन के सौगात देहे हें। उनखर नेतृत्व म राज्य सफलता के नित नवा ऊँचाई ल छूवत हे अउ हर क्षेत्र म लगातार विकास होवत हे।
एकर पहिली, बस्तर सांसद श्री महेश कश्यप ह संबोधित करत कहिन के जनजातीय संस्कृति अउ परंपरा कतको पीढ़ी ले चलत आवत हे। बस्तर के संस्कृति अउ विरासत के पूरा दुनिया म अलग पहिचान हे। आज के नवा पीढ़ी ल हमर सस्कृति अउ परंपरा ल सहेज के रखे के जरूरत हे। उमन मुख्यमंत्री श्री साय ल धन्यवाद देवत कहिन कि बस्तर पंडुम के 12 विधा मन म जनजातीय संस्कृति के प्रदर्शन के माध्यम ले सरकार कोति ले ए परंपरा मन ल सहेजे अउ संरक्षित करे के काम करे जात हे। बस्तर ओलंपिक के माध्यम ले युवा मन ल प्रतिभा देखाए के मउका मिलत हे अउ ओ मन ल मुख्यधारा ले जोड़े के काम करे जात हे। अइसन आयोजन ले आदिवासी संस्कृति अउ परंपरा आगू बढ़ही अउ बस्तर विकास अउ शांति के रद्दा म लगातार आगू बढ़ही।
मुख्यमंत्री ह आत्मसमर्पित माओवादी नव दम्पति ल दीन् आशीर्वाद
मुख्यमंत्री श्री साय ह बस्तर पण्डुम के जिला स्तरीय कार्यक्रम म शिरकत करिन। ए दौरान उमन आदिवासी व्यंजन, वेशभूषा, गहना अउ पुराना धरोहर मन के अवलोकन कर सहेजे के गोठ कहिन। मुख्यमंत्री कन्या विवाह योजना अंतर्गत माओवाद छोड़के मुख्यधारा म लौटे 04 जोड़ा ल आशीर्वाद प्रदान करके नवदाम्पत्य जीवन म प्रवेश के शुभकामना दीन्। मुख्यमंत्री ले आशीर्वाद प्राप्त करइया जोड़ा मन म गांव पोदावाड़ा के कमला गोटा अउ गांव ऐनमेटा के सुकलाल जुर्री, गांव कुर्सींग के सुशीला कोवाची अउ गांव तुषवाल के सन्नी सलाम, गांव पूसालामा के रीता कोवाची अउ इही गांव के मासो मण्डावी अउ गांव डूंगा के कोसी मण्डावी अउ इही गांव के अर्जुन सिंह शामिल रहिन। मुख्यमंत्री ह जम्मू बिहाव वाले जोड़ा मन ल आशीर्वाद प्रदान कर समाज के मुख्यधारा म शामिल होय के बधाई दीन।
ए मउका म छत्तीसगढ़ राज्य लघु वनोपज संघ के अध्यक्ष श्री रूपसाय सलाम सहित आन जनप्रतिनिधि, पंचायती राज अउ नगरीय संस्था मन के प्रतिनिधि अउ भारी संख्या म नागरिक मौजूद रहिन।
