रायपुर, मुख्यमंत्री श्री विष्णुदेव साय ह केंद्रीय बजट 2026-27 ऊपर अपन प्रतिक्रिया देवत कहिन के ये बजट भारत के सोनहा अउ विकसित भविष्य के दिशा म एक ऐतिहासिक दस्तावेज आय। कर्तव्य भवन म बने ये पहली बजट ए, जेमा देश के समग्र विकास अउ हर नागरिक के कल्याण ल ध्यान म रखत तीन प्रमुख कर्तव्य- आर्थिक विकास अउ रोजगार वृद्धि, जनता के उम्मीद ल पूरा करना अउ ‘सबका साथ, सबका विकास’ ल केंद्र म रखे गे हे।
मुख्यमंत्री ह कहिन के यशस्वी प्रधानमंत्री श्री नरेंद्र मोदी के नेतृत्व म केंद्रीय वित्त मंत्री श्रीमती निर्मला सीतारमण कोति ले प्रस्तुत ये बजट गरीब, किसान, युवा, महिला, मध्यम वर्ग अउ श्रमिक मन के उत्थान बर मील के पत्थर साबित होही। उमन कहिन के छत्तीसगढ़ जइसे राज्य मन ल ए बजट के सीधा लाभ मिलही।
खेती-किसानी अउ ग्रामीण अर्थव्यवस्था ल मजबूती
बजट म किसान मन के आमदनी बढ़ाए अउ ग्रामीण अर्थव्यवस्था ल सशक्त करे बर कइ ठन महत्वपूर्ण कदम उठाए गे हे। एआई अउ आधुनिक तकनीक के माध्यम ले खेती के पैदावार बढ़ाए, पशुपालन अउ डेयरी उद्योग ल बढ़ावा देहे के योजना बनाए गे हे। संग म महात्मा गांधी ग्राम स्वराज पहल के तहत स्थानीय उद्योग अउ हस्तशिल्प ल बढ़ावा देहे के गांव वाले मन बर रोजगार के नवा अवसर घलो बनही।
युवा मन बर रोजगार के नवा अवसर
मुख्यमंत्री ह कहिन के ए बजट म युवा मन बर रोजगार तैयार करे म विशेष जोर देहे गे हे। स्टार्टअप, एमएसएमई, मैन्युफैक्चरिंग अउ पर्यटन जइसे क्षेत्र म नवा अवसर पैदा होही। पर्यटन ल बढ़ावा देहे ले स्थानीय आर्थिक विकास ल गति मिलही अउ युवा मन ल अपनेच क्षेत्र म रोजगार मिलही। विदेश यात्रा अउ विदेश म पढ़ाई घलो पहली ले सस्ता होही।
स्वास्थ्य क्षेत्र म ऐतिहासिक पहल
स्वास्थ्य क्षेत्र ल लेके बजट ल ऐतिहासिक बतावत मुख्यमंत्री ह कहिन के बायोफार्मा सेक्टर बर 10 हजार करोड़ रुपया के प्रावधान करे गे हे, जेखर ले कैंसर, डायबिटीज सहित आने गंभीर बीमारी मन के दवाई सस्ता होही। जिला अस्पताल मन के उन्नयन, हर जिला म इमरजेंसी अउ ट्रॉमा सेंटर के स्थापना, मानसिक स्वास्थ्य अउ आयुर्वेदिक इलाज ल बढ़ावा देहे के संगे-संग मेडिकल टूरिज्म बर राज्य मन म पांच रीजनल हब बनाय जाही। एकर ले छत्तीसगढ़ सहित पूरा देश म स्वास्थ्य सेवा के स्तर बढ़िया होही अउ रोजगार के नवा रद्दा घलो खुलही।
महिला सशक्तिकरण ल नवा दिशा
लखपति दीदी योजना के विस्तार के माध्यम ले महिला मन ल क्रेडिट-लिंक्ड स्वरोजगार, उद्यम अउ स्थानीय बाजार ले जोड़े के व्यवस्था करे गे हे। एकर अलावा हर जिला म नोनी मन बर छात्रावास बनाए के घोषणा ले ओ मन ल उच्च शिक्षा म सहायता मिलही।
उद्योग, शिक्षा अउ खेल ल बढ़ावा
देश के आर्थिक मजबूती बर 7 हाई-स्पीड रेल कॉरिडोर, 20 नवा जलमार्ग, बड़े टेक्सटाइल पार्क अउ 4 राज्य मन म खनिज कॉरिडोर के घोषणा करे गे हे। सेमीकंडक्टर मिशन बर 40 हजार करोड़ रुपया के निवेश ले औद्योगिक विकास अउ रोजगार ल नवा गति मिलही। उहें खेलो इंडिया मिशन अउ शिक्षा क्षेत्र म सुधार ले लइका अउ युवा मन ल बेहतर अवसर मिलही।
कर सुधार अउ आम जनता ल राहत
आयकर प्रक्रिया ल सरल बनाए गे हे अउ छोटे करदाता मन बर आसान व्यवस्था करे गे हे। दवाई, कपड़ा, जूता, मोबाइल, ईवी बैटरी, सोलर सामान, बायोगैस-सीएनजी सहित कतको रोज के खर्चा वाला चीज सस्ता होही, जेखर ले आम जनता ल सीधा राहत मिलही।
आखिरी म मुख्यमंत्री ह कहिन के केंद्रीय बजट 2026-27 ‘सबका साथ, सबका विकास, सबका प्रयास अउ सबका विश्वास’ के भावना ल अउ मजबूत करथे। ये बजट छत्तीसगढ़ सहित पूरा देश म समावेशी विकास पक्का करही। उमन छत्तीसगढ़ के जनता कोति ले प्रधानमंत्री श्री नरेंद्र मोदी अउ केंद्रीय वित्त मंत्री श्रीमती निर्मला सीतारमण ल ए ऐतिहासिक, विकासशील अउ जनकल्याणकारी बजट बर गाड़ा-गाड़ा धन्यवाद दीन।
