हौसला के उड़ान: अड़चन मन ला पाछू छोड़के सिविल सेवा तक पहुँचिस सुश्री मधु साहू

मिहनत, आत्मविश्वास अउ सरकारी सहयोग ले पूरा होइस दिव्यांग बेटी के सपना
रायगढ़, संघर्ष, संकल्प अउ सरलग मिहनत के मिसाल बन गे सुश्री मधु साहू ह, वो ह सिद्ध कर देहे हे के शारीरिक चुनौती सफलता के डगर मं बाधा नइ बन सकय। 40 प्रतिशत अस्थि बाधित दिव्यांगता अउ कम संसाधन के बाद घलो ओ ह कड़ा मिहनत अउ आत्मविश्वास के दम मं छत्तीसगढ़ अधीनस्थ लेखा सेवा अधिकारी (वित्त विभाग) के पद मं चयन होके अपन सपना ला पूरा करिन अउ प्रदेश के दिव्यांग युवा मन बर प्रेरणा बनिन।
रायगढ़ जिला के तमनार गाँव के रहइया सुश्री मधु साहू ह प्रतिकूल हालत ला कभू अपन आत्मबल उपर हावी नइ होवन दिस। रोज के पढ़ई, अनुशासित दिनचर्या अउ आत्मविश्वास के संग ओ ह प्रतियोगी परीक्षा मन के तैयारी जारी रखिस। शारीरिक तकलीफ के बाद घलो ओकर संकल्प अटल रहिस अउ इही सरलग मिहनत ओखर सफलता के नेंव बनीस।
ओखर ए उपलब्धि मं समाज कल्याण विभाग डहर ले चलाय जात “क्षितिज अपार संभावनाएं” सिविल सेवा प्रोत्साहन योजना के तहत पात्र पाय जाय मं 50 हजार रूपया के एकमुश्त प्रोत्साहन राशि डीबीटी (DBT) के माध्यम ले वोला देहे गीस। ए आर्थिक मदद ओखर बर सिरिफ़ रकम नो हे, बल्कि ओखर संघर्ष अउ मिहनत के सरकारी पहिचान आय।
प्रोत्साहन राशि पाय के बाद सुश्री मधु साहू ह भावुक होके कहिस के ए सहयोग ले ओ ला नइ केवल आर्थिक सहारा मिलिस, बल्कि ए बिसवास घलो मजबूत होइस के राज्य सरकार ओखर संग ठाढ़े हे। ओ ह कहिस के ए प्रोत्साहन ओ ला आगू के तैयारी अउ जिम्मेदारी ला निभाय मं नवा ऊर्जा अउ आत्मविश्वास देही।
सुश्री मधु साहू ह अपन सफलता के श्रेय अपन परिवार, गुरुजी मन अउ जिला प्रशासन अउ समाज कल्याण विभाग ला देवत आभार जताइस। ओखर कहिनी ए संदेस देथे के मिहनत जब संकल्प ले जुड़थे अउ सरकार के संवेदनशील नीति मन के संग मिलथे, त हर “असम्भव” काम घलो सम्भव बन जाथे।