वनांचल गाँव मन के बदलिस तसवीर ; स्वास्थ्य करमी, लइका अउ ग्रामीण मन ला मिलिस गाड़ी के सुविधा
सरगुजा, छत्तीसगढ़ सरकार डहर ले सुरू करे गे मुख्यमंत्री ग्रामीण बस योजना के उद्देश्य सुदूर वनांचल, खास करके बस्तर अउ सरगुजा के इलाका मन मं, ग्रामीण मन ला सुलभ अउ सुरक्षित परिवहन देना हे। ए योजना के माध्यम ले दूरिहा के गाँव मन ला जिला मुख्यालय, स्कूल, अस्पताल अउ रेलवे स्टेशन मन ले जोड़े जात हे।
दूरिहा के इलाका मन मं बस पहुँचे ले डगर होइस आसान
मुख्यमंत्री ग्रामीण बस योजना सिरिफ़ सड़क मं नइ दउंड़त हे, बल्कि ए ग्रामीण मन के टेम, सुविधा अउ सपना मन ला सँजोय के माध्यम बन गे हे। सरगुजा जिला के बादा ले बरियों, चारपारा, ककना, सिधमा, अखोराखुर्द, रूखपुर, चिखलाडीह, नर्मदापारा, सरगवां अउ अम्बिकापुर तक बस सेवा सुरू होय ले ग्रामीण मन मं भारी उत्साह हे। मुख्यमंत्री श्री विष्णु देव साय के दूरगामी सोच अउ संवेदनशीलता के ही फल हे के आज सरगुजा जिला के उहू वनांचल मं विकास के गूँज सुनाथे, जिहाँ कभू आना-जाना एक बड़का चुनौती रहिस।
सुगम होइस सफर, समय के होइस बचत
शहरी सुवास्थ्य अस्पताल मं काम करइया श्रीमती परमानिया पैकरा ह अपन खुसी बाँटत कहिस के ए रद्दा मं ए पहली बस सेवा आय। ओ ह कहिस, “पहली ड्यूटी मं टेम मं पहुँचना अउ सुरक्षित घर वापस आना एक बड़का चिंता रहिस। फेर जब ले ए बस सुरू होय हे, हमन ला बहुते सुविधा मिलत हे। अब हमन टेम मं अस्पताल पहुँचथन अउ बखत मं घर घलो लहुट आथन।” उहें सुवास्थ्य करमी चंदा टोप्पो ह कहिस के बांदा क्षेत्र मं आवागमन के साधन नइ के बराबर रहिस, बस सुरू होय ले ओमन के पेसावर जिनगी अउ आसान हो गे हे।
लइका मन बर वरदान बनीस बस सेवा
विद्यार्थी मन के जिनगी मं ए योजना ह क्रांतिकारी बदलाव लाय हे। नर्सिंग के छात्रा लक्ष्मी कहिथे के पहली बस धरे बर ओला बहुते मिहनत करे बर परत रहिस, फेर अब बस ओकर घर के आगू ले ही गुजरथे। उहें पीजी कॉलेज के छात्रा निशा ह कहिस के पहली ओला 5 किलोमीटर पैदल चलना परत रहिस, म अब सिदमा गाँव ले ही बस मिलत हे, जेकर ले ओ ह गाँधी चौक तक के सफर बिना कोनो अड़चन के तय करत हे।
पैदल अउ बाइक के लम्बा सफर ले मिलिस छुट्टी
सरगुजा जिला के सिदमा गाँव के रहइया दिव्यांशु सिंह ह बताइस के बस सुविधा नइ होय के सेती ओला रोज 5 किलोमीटर तक बाइक या पैदल जाना परत रहिस। दिव्यांशु कहिथे के अब गाँव ले ही बस चलत हे, जेकर ले ओ ह स्कूल टेम मं पहुँच जाथे।
विकास के मुख्यधारा ले जुड़त हे गाँव
मुख्यमंत्री ग्रामीण बस योजना सिरिफ़ एक गाड़ी नवा ए, बल्कि सुशासन के उही भरोसा आय जे ह सुदूर इलाका मन ला सहर के मुख्यधारा ले जोड़े के काम करे हे। रोज बस चले ले व्यापार, शिक्षा अउ सुवास्थ्य सेवा तक पहुँच आसान हो गे हे। मुख्यमंत्री श्री विष्णु देव साय के पहल ले आखिरी कतार मं ठाढ़े मनखे मन घलो मजबूत बनत हें।
