“मोर सुआद-दीदी के रसोई” म पारंपरिक व्यंजन के राज्यपाल अउ मुख्यमत्री चखिन सुआद

कोंडागांव, राष्ट्रपति श्रीमती द्रौपदी मुर्मू के मुख्य आतिथ्य म आज होवइया संभाग स्तरीय ‘बस्तर पंडुम’ म संघरे खातिर जगदलपुर जाय के पहिली, छत्तीसगढ़ के राज्यपाल श्री रमेन डेका अउ मुख्यमत्री श्री विष्णुदेव साय सुकरवार के सड़क रद्दा ले रायपुर ले जगदलपुर बर रवाना होइन। ए बीच मुख्यमत्री श्री साय ह केसकाल सहर म राष्ट्रीय राजमार्ग-30 म चलत नवीनीकरण काम के जायजा लीन।
जांच के बखत मुख्यमत्री ह सड़क बनाय के काम के गुनवत्ता अउ ओकर अभी के स्थिति ल देखिन। ओमन अधिकारी मन ल निर्देश देवत कहिन के राष्ट्रीय राजमार्ग-30 बस्तर संभाग ल राजधानी रायपुर अउ दूसर राज्य मन ले जोड़इया एक बड़का रद्दा आय, एकर सेती काम म कोनो किसम के लापरवाही बर्दाश्त नइ करे जाय। ओमन साफ कहिन के सड़क के काम ल तय मापदंड के मुताबिक अउ बने गुनवत्ता के संग पूरा करव।
मुख्यमत्री श्री साय ह कलेक्टर ल निर्देश दीन के केसकाल सहर के संगे-संग केसकाल बायपास के काम ल घलो तय समय म पूरा करे जाय अउ एकर सरलग निगरानी करे जाय, ताकि आम जनता ल चले-फिरे म सुग्घर अउ सुरक्षित सुबिधा मिल सकय।
एकर बाद राज्यपाल श्री रमेन डेका अउ मुख्यमत्री श्री विष्णुदेव साय कोंडागांव पहुंचिन, जिहाँ ओमन बिहान योजना के तहत स्व-सहायता समूह के महिला मन ले संचालित “मोर सुआद दीदी के रसोई” ल देखिन। ए बखत बिहान समूह के महिला मन ह राज्यपाल अउ मुख्यमत्री के पारंपरिक रूप ले सुग्घर स्वागत करिन। राज्यपाल अउ मुख्यमत्री ह उहाँ के पारंपरिक व्यंजन फरा अउ अंगाकर रोटी के सुआद घलो चिखिन।
मुख्यमत्री श्री साय ह समूह के महिला मन ले ओमन के कमाई अउ काम-काज के जानकारी लीन अउ कलेक्टर श्रीमती नूपुर राशि पन्ना ल निर्देश दीन के महिला मन ल रोजगार बर आगू बढ़ाए बर हमेशा सहयोग करे जाय। ओमन कहिन के अइसन उदीम ले गांव के महिला मन आर्थिक रूप ले आत्मनिर्भर बनहीं। ए बीच मुख्यमत्री ह जिला के कलाकार मन के बनाय पेंटिंग्स ल घलो देखिन अउ कलाकार मन के सराहना करिन।
ए मउका म केंद्रीय राज्य मत्री श्री तोखन साहू, बस्तर सांसद श्री महेश कश्यप, कोंडागांव विधायक सुश्री लता उसेंडी संग अउ कतको जनप्रतिनिधि अउ अधिकारी मन उपस्थित रहिन।