125 दिन के रोजगार गारंटी
दंतेवाड़ा, सासन के बड़का योजना ‘विकसित भारत जी राम जी’ (वीबी जी राम जी) के तहत दंतेवाड़ा जिला के ग्राम पंचायत मन म हर महीना के 07 तारीख ला रोजगार दिवस, चावल उत्सव अऊ आवास दिवस मनाय जात हे। ए कार्यक्रम के जरिया गांव वाला मन अऊ जनप्रतिनिधि मन ला सरकारी योजना मन के जानकारी देहे जात हे।
जरूरतमंद ग्रामीण परिवार तक रोजगार पहुँचाना
अधिकारी मन ह बताइन के पहिली महात्मा गांधी राष्ट्रीय ग्रामीण रोजगार गारंटी योजना (मनरेगा) म 100 दिन के रोजगार मिलत रहिस, जेला अब ‘विकसित भारत जी राम जी’ योजना म बढ़ा के 125 दिन कर देहे गे हे। ए योजना के मकसद गांव के हर जरूरतमंद परिवार तक काम के मौका पहुँचाना हे।
QR कोड ले बढ़िस पारदर्शिता
कार्यक्रम म गांव वाला मन ला क्यूआर (QR) कोड आधारित नवा सिस्टम के बारे म बताय गिस। अब जॉब कार्ड अऊ मस्टर रोल के मिलान क्यूआर कोड स्कैन करके करे जावत हे, जेखर से काम म पारदर्शिता आए हे अऊ गड़बड़ी के संका कम हो गे हे।
बने घर बनाय बर तकनीकी जानकारी
प्रधानमंत्री आवास योजना (ग्रामीण) के तहत जेकर-जेकर नाम मंजूर होय हे, ओमन के नाम पढ़ के सुनाय गिस। संग म घर बनाय बर मिलने वाला किस्ती, मजूरी भुगतान, सामान अऊ दूसर विभाग ले मिलने वाला सुविधा के जानकारी दीस। अधिकारी मन ह हितग्राही मन ला समय म अऊ बने क्वालिटी के घर बनाय बर तकनीकी सलाह घलोक दीन।
तकनीकी ले काम म आई सफाई
रोजगार दिवस म राष्ट्रीय ग्रामीण आजीविका मिशन अऊ विकसित भारत जी राम जी योजना म मिलने वाला रोजगार गारंटी के गोठ घलोक होइस। बताय गिस के ‘विकसित भारत 2047’ के लक्ष्य ला देखत हुए ग्रामीण परिवार मन के कमाई बढ़ाय बर ए पहल करे जावत हे। कार्यक्रम म बायोमेट्रिक, मोबाइल ले निगरानी अऊ जनता के भागीदारी जइसे आधुनिक तरीका मन के जानकारी दे गिस, ताकि काम के हाजिरी अऊ पैसा के भुगतान म कोनो हेराफेरी झन होवय।
डबरी बना के मछली पालन अऊ आजीविका ला बढ़ावा
एखर अलावा आजीविका डबरी बनाय के बारे म घलोक गांव वाला मन ला बताय गिस। डबरी बना के मछली पालन अऊ दूसर काम मन ले कइसे कमाई बढ़ाय जा सकत हे, एखर ऊपर घलोक गोठ होइस। कार्यक्रम के आखिरी म गांव वाला मन ले अपील करे गिस के ओमन हर महीना के 07 तारीख ला होय वाला ए कार्यक्रम म जरूर आवंय अऊ सरकारी योजना मन के जादा ले जादा लाभ उठावंय।
