दुर्ग, बालोद अउ बेमेतरा जिला पहुँच के योजना मन के करिन निरीक्षण, पशुपालक मन ले करिन गोठ-बात
प्रदेस म पशुधन योजना मन के बढ़िया काम-काज के करिन सराहना
रायपुर, भारत सरकार कोति ले तय करे गय केन्द्रीय पर्यवेक्षक मन के दल ह 09 ले 14 फरवरी तक छत्तीसगढ़ प्रवास म रहिन। ए बखत ओमन पशुधन विकास विभाग के केंद्र सरकार कोति ले चलइया योजना मन के छत्तीसगढ़ म प्रगति के जानकारी लीन। केंद्रीय पर्यवेक्षक मन के दल ह दुर्ग, बालोद अउ बेमेतरा जिला के दौरा करके योजना मन के जांच करिन अउ पशुपालक मन ले गोठ-बात करिन। केंद्रीय दल ह छत्तीसगढ़ म पशुधन विकास योजना मन के सुग्घर संचालन के खूब सराहना करिन।
प्रवास के पहिली चरन म संचालनालय स्तर म आयोजित बैठक म कृषि उत्पादन आयुक्त अउ प्रमुख सचिव के साथे योजना मन के स्थिति म चर्चा करे गीस। एखर बाद दल ह गाँव-गाँव जाके प्रशिक्षण काम, प्रयोगशाला अउ पशु प्रजनन केंद्र मन के अवलोकन करिन। बालोद जिला के गुण्डरदेही अउ डौंडी विकासखंड म बिहान योजना ले जुड़े ‘पशु सखी’ मन ले ओमन के काम करे के तरीका के जानकारी लीन।
उद्यमिता विकास कार्यक्रम के तहत चलइया छेरी पालन इकाई, हैचरी यूनिट अउ दूध संकलन केंद्र मन के निरीक्षण करके पशुपालक मन ले गोठ बात करिन। दुर्ग म बने दुग्ध संघ संयंत्र म दूध के प्रसंस्करण अउ पैकेजिंग बेवस्था के समीक्षा करे गीस। संगे-संग पशु अस्पताल अउ मोबाइल वेटेरिनरी यूनिट म दवई अउ औजार मन के जांच करके जरूरी निरदेस दीन। प्रवास के बखत बालोद जिला म आयोजित जिला स्तरीय पशु मेला म घलो दल ह सामिल होईस।
राष्ट्रीय गोकुल मिशन के तहत टीम ह पशु चिकित्सा अउ पशुपालन महाविद्यालय, अंजोरा (दुर्ग) के भ्रमण करिस अउ ट्रेनिंग कार्यक्रम मन के जानकारी लीस। संगे-संग मैत्री अउ एवीएफओ रिफ्रेशर ट्रेनिंग संस्थान अउ सरकारी पशु प्रजनन केंद्र म बने ई.टी.टी.-आई.वी.एफ. लैब के निरीक्षण करे गीस।
नेशनल लाइवस्टॉक मिशन के तहत ग्राम भरदा (दुर्ग) म श्री देवनाथ देशमुख, नवागांव (बेमेतरा) म श्रीमती मनीषा राजपूत अउ बालोद जिला के ग्राम गब्दी अउ बरही म चलत छेरी इकाई मन के जानकारी लीन। एखर अलावा बेमेतरा जिला के ग्राम खर्रा अउ सुरहोली म स्काईलार्क हैचरी अउ बालोद जिला के एबीस हैचरी यूनिट के घलो जांच करे गीस।
डेयरी विकास बर नेशनल प्रोग्राम के तहत टीम ह उरला (दुर्ग) म छत्तीसगढ़ सहकारी दुग्ध महासंघ प्लांट के भ्रमण करिन अउ दूध, घी अउ मक्खन बनाय के इकाई ला देखिन। बालोद के अर्जुंदा अउ बेमेतरा के सरदा अउ मौली भाठा म दूध संकलन केंद्र मन म पशुपालक मन ले चर्चा करे गीस।
पशु सेहत अउ बीमारी नियंत्रण कार्यक्रम के तहत बेमेतरा जिला म कोल्ड केबिनेट अउ शीत श्रृंखला मशीन मन के निरीक्षण करे गीस। ग्राम बोहारडीह (बेमेतरा) के उन्नत पशुपालक श्री मानसिंह वर्मा के डेयरी फार्म ला घलो देखिन। दौरा के बखत बालोद जिला के ग्राम भेंगारी म आयोजित जिला स्तरीय पशु मेला म केन्द्रीय टीम ह सामिल हो के पशुपालक मन ले सीधा गोठ बात करिन अउ योजना ले मिलत फायदा के जानकारी लीन।
