सालाना लगभग 2.50 लाख रुपया के होवत हे कमाई, गाँव के माईलोगन मन बर बनिस प्रेरणास्रोत
जशपुर, अपन दुकान म सिंगार के सामान ले लेके घर के जरूरी सामान बेचइया प्रीति गुप्ता ह महिला सशक्तिकरण के एक मिसाल बन गे हे। ओकर चेहरा म एक अलग किसम के भरोसा दिखथे। ओ ह बड़ उतसाह के संग बताथे के मुद्रा लोन के मदद ले ओ ह अपन व्यापार खड़ा कर पाए हे। ‘लक्ष्मी स्व-सहायता समूह’ ले जुड़े प्रीति ह बताईस के ओला 01 लाख रुपया मुद्रा लोन के रूप म मिले रहिस। आज ओ ह अपन व्यापार ले सालाना लगभग 2.50 लाख रुपया तक के कमाई कर लेथे।
जशपुर जिला के विकासखंड बगीचा के ग्राम बुढाडांड के रहइया प्रीति गुप्ता ह मुद्रा लोन लेके ‘दुर्गा श्रृंगार अऊ किराना दुकान’ के सुरूआत करिस। पहिली छोटे स्तर म दुकान चलइया प्रीति ह धीरे-धीरे ग्राहक मन के जरूरत ला समझिस अउ दुकान ला बढ़ाइस। आज ओकर दुकान ह गाँव के खास दुकान मन म गिने जाथे। सिंगार के सामान ले लेके हर जरूरत के सामान ओकर दुकान म मिल जाथे। मुद्रा लोन ले मिले आर्थिक मदद अउ मेहनत के ही फल आय के आज ओ ह हर बछर लगभग 2.50 लाख रुपया के सुध लाभ कमावत हे। ओ ह अपन आतम-भरोसा (आत्मविश्वास), मेहनत अउ ‘बिहान’ योजना के सहयोग ले ‘लखपति दीदी’ बने के सपना ला सच कर देखाए हे।
प्रीति गुप्ता ह मुख्यमंत्री श्री विष्णुदेव साय के आभार जतावत कहिस के माईलोगन मन ला मजबूत बनाय बर करे जात काम के सेती आज मोर जइसे कतकोन महिला मन आत्मनिर्भर हो पाय हें। ओ ह कहिस के बिहान ह मोला अपन गोड़ म खड़ा होय के मउका दीस। प्रीति गुप्ता आज कतकोन माईलोगन मन बर प्रेरणा बन गे हे, जेन अपन मेहनत अउ संकलप ले आर्थिक आजादी के नवा मिसाल कायम करत हे।
