मुख्यमंत्री ह राष्ट्रीय जिम्मेदारी ल पूरी गंभीरता, सटीकता अउ संवेदनशीलता के संग निभाए के करिन अपील
छत्तीसगढ़ राज्य अउ संभाग स्तरीय अधिकारी मन के प्रशिक्षण सम्मेलन आयोजित
रायपुर, भारत के जनगणना-2027 ल सफल बनाए बर आयोजित राज्य अउ संभाग स्तरीय अधिकारी मन के प्रशिक्षण सम्मेलन म मुख्यमंत्री श्री विष्णु देव साय ह कहिन के जनगणना सिरिफ मनखे मन के गिनती नोहे, बल्कि राष्ट्र निर्माण के आधारसिला आय। ओमन प्रदेश के जम्मो संभागायुक्त, कलेक्टर अउ प्रशासनिक अधिकारी मन ले ए महत्वपूर्ण राष्ट्रीय जिम्मेदारी ल पूरी गंभीरता, सटीकता अउ संवेदनशीलता के संग निभाए के नेवता दीन।
मुख्यमंत्री ह कहिन के बछर 2027 के जनगणना ह आजादी के बाद आठवीं जनगणना होही। जनगणना ह सासन के बिसवास अउ काम-काज के पारदर्शिता के परीछा आय। ओमन साफ कहिन के यदि आँकड़ा मन म कोनो कमी या गलती होही त विकास योजना मन के लछ्य ह प्रभावित होही। एक घलो मनखे या परिवार ह छूटना नहीं चाहिए, काबर के एकर ले विकास के रद्दा रुक सकथे। ओमन बताइन के जनगणना-2027 भारत के पहिली पूरा डिजिटल जनगणना होही। मोबाइल ऐप अउ वेब पोर्टल के माध्यम ले जानकारी (डेटा) जुटाए जाही, जेकर ले काम ह जादा पारदर्शी, झटकुन अउ असरदार होही। छत्तीसगढ़ म पहिली चरण म मकान मन के सूची बनाना अउ मकान मन के गिनती के काम 1 मई ले 30 मई 2026 तक करे जाही। ए काम ह प्रदेश के 33 जिला, 252 तहसील अउ 19,978 गाँव मन म पूरा करे जाही।
मुख्यमंत्री ह कहिन के ‘स्व-गणना’ (अपने ले जानकारी भरना) के सुबिधा ले जनता के भागीदारी बढ़ही अउ जनता के बिसवास ही जनगणना के सफलता के आधार आय। ए काम ह विकसित अउ आत्मनिर्भर भारत-2047 के बुनियाद रखे वाला साबित होही। प्रशिक्षण सम्मेलन म मुख्य सचिव श्री विकासशील ह कहिन के जनगणना एक महत्वपूर्ण प्रशासनिक प्रक्रिया आय। ओमन अधिकारी मन ल जम्मो काम ल तय समय म पूरा करे के निर्देश दीन।
मुख्य सचिव ह प्रगणक (जानकारी जुटाए वाला कर्मचारी) मन के ट्रेनिंग म ‘सपोर्टिव सुपरविजन’ के तरीका अपनाए ऊपर जोर दीन। ओमन कहिन के मैदानी स्तर म काम करे वाला कर्मचारी मन ल बराबर सलाह अउ सहयोग मिलना चाहिए, जेकर ले गलती के गुंजाइश कम हो जाए। ओमन सीमावर्ती जिला मन के बारे म कहिन के दूसर राज्य म गे मनखे मन के गिनती म दोहराव झन होय, एकर बर बिसेस सावधानी बरते जाए।
ए मौका म भारत के महारजिस्ट्रार अउ जनगणना आयुक्त श्री मृत्युंजय कुमार नारायण ह कहिन के जनगणना दुनिया के सबले बड़े प्रशासनिक काम मन म ले एक आय। ओमन बताइन के भारत म पहिली संगठित जनगणना बछर 1872 म सुरु होय रहिस अउ अब के जनगणना ह देस के 16वीं अउ आजादी के बाद के 8वीं जनगणना होही। 150 बछर के परंपरा वाली भारतीय जनगणना ह गाँव, सहर अउ वार्ड स्तर तक के आँकड़ा के सबले बड़े सोत आय।
गृह विभाग के अपर मुख्य सचिव श्री मनोज पिंगुआ ह कलेक्टर मन ल जनगणना-2027 ले जुड़े काम के बारे म विस्तार ले जानकारी दीन। मुख्यमंत्री के सचिव श्री राहुल भगत, छत्तीसगढ़ राज्य जनगणना निदेशक कार्तिकेय गोयल ह जनगणना के आधारभूत जानकारी दीन। ए सम्मेलन म राज्य सरकार के अलग-अलग विभाग के बड़े अधिकारी, संभागायुक्त, कलेक्टर, नगर निगम आयुक्त अउ जनगणना निदेशालय के अधिकारी मन उपस्थित रहिन।
