1.72 लाख करोड़ के बजट पेस, पढ़ाई, उद्योग अउ कनेक्टिविटी मा भारी निवेश
अबूझमाड़ अउ जगरगुंडा मा बनही ‘एजुकेशन सिटी’
करमचारी मन ला ‘कैशलेस’ इलाज के सौगात
रायपुर, छत्तीसगढ़ मा साय सरकार ह बछर 2026-27 बर 1.72 लाख करोड़ रुपिया के बजट पेस करे हे। एमा बस्तर अउ नक्सल प्रभावित इलाका मन मा पढ़ाई, स्वास्थ्य, खेती-किसानी, डिजिटल नेटवर्किंग अउ रोजगार बर बड़ योजना मन लउकत हे। वित्त मंत्री ओपी चौधरी ह साय सरकार के तीसरा बजट ‘संकल्प’ थीम मा पेस करिन।
मुख्यमंत्री विष्णुदेव साय ह ए बजट ला मनखे मन के भलाई अउ विकास बर समर्पित बताइन। उमन कहिन के ए बजट ले किसान, महिला, युवा अउ करमचारी मन ला ताकत मिलही। खेती, उद्योग अउ बुनियादी ढांचा मा खास धियान देय ले प्रदेश मा रोजगार के नवा मौका मिलही अउ जनता के जिनगी सुधरही।
बजट के खास आंकड़ा
सरकार ह ए बछर कुल 1.72 लाख करोड़ रुपिया खरचा करे के लच्छ राखे हे। एमा ले 1.45 लाख करोड़ रुपिया राजस्व खरचा अउ 26,500 करोड़ रुपिया पूंजीगत खरचा (परिसंपत्ति निर्माण) बर हे। केंद्र ले मिलइया मदद ला 4,000 करोड़ ले बढ़ा के 8,500 करोड़ रुपिया कर देहे गे हे। राजकोषीय घाटा ला घलो काबू मा राखे गे हे, जेन राज के मजबूत आर्थिक स्थिति ला देखाथे।
बजट मा सबसे जादा 40% हिस्सा सामाजिक क्षेत्र बर, 36% आर्थिक काम-काज बर अउ 24% प्रसासनिक सेवा बर रखे गे हे। पर्यावरण ला बचाय बर 14,300 करोड़ के ‘ग्रीन बजट’ के घलो प्रावधान हे।
बस्तर अउ सरगुजा बर खास घोषणा
एजुकेशन सिटी: अबूझमाड़ अउ जगरगुंडा जइसन संवेदनशील इलाका मा 100 करोड़ के लागत ले ‘एजुकेशन सिटी’ बनाय जाही।
बस्तर ओलंपिक अउ पंडुम: स्थानीय खेल अउ संस्कृति ला बढ़ावा देय बर संसाधन दे जाही।
बस्तर फाइटर्स: 1500 नवा पद मन मा भर्ती करे जाही।
स्वास्थ्य सुविधा: जगदलपुर मा सुपर स्पेशलिटी अस्पताल अउ दंतेवाड़ा मा मेडिकल कॉलेज अउ मेडिकल सिटी बनही।
इंद्रावती बैराज: इंद्रावती नदिया मा 2024 करोड़ ले बैराज बनही, जेकर ले 32 हजार हेक्टेयर खेत ला पानी मिलही।
महिला मन बर बड़ छूट
रजिस्ट्री मा छूट: महिला मन के नांव ले जमीन-जायदाद खरीदे मा पंजीयन सुल्क Registration Fee) मा 50% के छूट मिलही।
रानी दुर्गावती योजना: बेटी मन के 18 बछर पूरा होय मा 1.5 लाख रुपिया के मदद दे जाही।
महतारी सदन: महिला मन बर 250 महतारी सदन बनाय जाही।
खेती-किसानी अउ करमचारी कल्याण
कृषक उन्नति योजना: 10 हजार करोड़ के प्रावधान।
सिंचाई पंप: 5,500 करोड़ के व्यवस्था।
भूमिहीन किसान: अइसन परिवार मन बर 600 करोड़ रुपिया रखे गे हे।
कैशलेस इलाज: सरकारी करमचारी मन ला अब अस्पताल मा नगद पइसा दे के जरूरत नई पड़ही, ओमन बर 100 करोड़ ले कैशलेस सुविधा सुरू करे जाही।
बजट 2026-27 के अउ मुख्य बात मन
रायपुर मा 200 बिस्तर के नवा अस्पताल अउ कालीबाड़ी मा जच्चा-बच्चा अस्पताल (MCH) बनही।
5 बड़े एयरपोर्ट मा छत्तीसगढ़ी सामान मन के शोरूम खुलही।
सयानगुड़ी योजना: एला पूरा प्रदेश मा लागू करे जाही (5 हजार करोड़)।
नालंदा लाइब्रेरी: पढ़ाई बर 5 नवा आधुनिक लाइब्रेरी (22 करोड़)।
शहीद वीर नारायण सिंह आयुष्मान योजना: 5 लाख तक के मुफ्त इलाज बर 1500 करोड़।
उद्योग: उद्योग विभाग के बजट बढ़ा के 1750 करोड़ करे गे हे।
वन संरक्षण: 930 करोड़ के प्रावधान अउ 1000 नवा पद मा भर्ती।
खेल: नवा रायपुर मा राष्ट्रीय तीरंदाजी अकादमी अउ आधुनिक स्पोर्ट्स कॉम्प्लेक्स बनही।
