ए पईत प्राकृतिक रंग ले रंगीन होही होरी : स्व सहायता समूह के महिला मन बनावत हें प्राकृतिक गुलाल

गरियाबंद, रंग के तिहार होरी ल स्व सहायता समूह के महिला मन ए पईत अउ खास बनावत हें। होली के तिहार ल प्राकृतिक रंग ले मनाय बर महिला मन हर्बल गुलाल बनावत हें। गरियाबंद जिला के ग्राम सढ़ौली के राखी महिला ग्राम संगठन के 10 सक्रिय महिला मन राष्ट्रीय ग्रामीण आजीविका मिशन ‘बिहान’ के तहत हर्बल गुलाल बनाके आत्मनिर्भरता अउ स्वावलंबन के मिसाल पेश करत हें। समूह के महिला मन पलाश ले पीयर, चुकंदर ले लाल अउ पालक के पाना ले हरियर रंग निकाल के मक्का के सुखा डंढली ले मिले अरारोट पाउडर म मिलाके प्राकृतिक गुलाल तइयार करत हें। एमां नुकसान पहुँचाय वाला रसायनिक तत्व मन के प्रयोग नइ करे जाय।
जेखर ले हर्बल गुलाल चमड़ी अउ सेहत बर सुरक्षित रहिथे। राखी महिला ग्राम संगठन के ए महिला मन नइ केवल होली के तिहार ल प्राकृतिक अउ सुरक्षित बनावत हें, बल्कि अपन आजीविका ल घलो मजबूत करत हें। मुख्यमंत्री श्री विष्णुदेव साय के अगुवाई म छत्तीसगढ़ के ग्रामीण महिला मन आत्मनिर्भरता अउ स्वावलंबन के नवा कहानी लिखत हें। ए पहल प्रदेश म महिला सशक्तिकरण के डहार म एक क्रांतिकारी कदम साबित होवत हे। कलेक्टर अउ जिला पंचायत के मुख्य कार्यपालन अधिकारी ह ए महिला मन के मेहनत के सराहना करत उमन के उज्जर भविष्य के सुभकामना दीन अउ कहिन के आज महिला मन स्वरोजगार अपनाके आत्मनिर्भर बनत हें अउ समाज म अपन अलग पहिचान बनावत हें। पीआरपी मीना साहू ह बताइस के पछू बछर घलो बिहान समूह के दीदी मन कुल 30 हजार रूपया ले जादा के बिक्री करके लगभग 10 हजार रूपया ले जादा के सुध मुनाफा कमाए रिहिन।
समूह के महिला मन ले गोठबात करे ले पता चलिस के पारंपरिक तरीका ले बनाय गे प्राकृतिक गुलाल ले नइ केवल सेहत बने रइही, बल्कि ए पर्यावरण बर घलो अनुकूल रइही। संगे च महिला मन बर आय के नवा जरिया घलो बनत हे। पाछू बछर हर्बल गुलाल के मांग जादा रहिस, जेला देखत ए पईत महिला मन रंग बनाना सुरू कर देहे हें। महिला मन बताइन के गुलाल बनाय के तरीका पूरा प्राकृतिक हे। एला तइयार करे म फूल अउ पाना मन के प्रयोग करे जाथे, जेखर ले ए चमड़ी बर सुरक्षित रहिथे। अलग-अलग रंग बनाय बर प्राकृतिक चीज मन के उपयोग करे जाथे; गुलाबी रंग बर चुकंदर अउ गुलाब के पंखुड़ी, पीयर रंग बर हरदी अउ गेंदा फूल, हरियर रंग बर पालक अउ मेंहदी के पाना, नीला रंग बर अपराजिता के फूल अउ लाल रंग बर टेसू के फूल मन के उपयोग करत हें।