रायपुर, मुख्यमंत्री श्री विष्णु देव साय ह आज रायपुर प्रेस क्लब डहर ले आयोजित होली मिलन समारोह “रंगोत्सव” अउ “महामूर्ख सम्मेलन 2026” म सामिल होइन। ए मउका म मुख्यमंत्री ह प्रदेस के मनखे मन ला होली के बधाई देवत कहिन के होली ह सिरिफ रंग के तिहार नोहे, बल्कि ए ह आपसी मया, सद्भाव अउ भाईचारा ला मजबूत करे के पबितर बेरा घलो ए। ए तिहार ह हमर छोटे-मोटे अनबन अउ गिला-शिकवा ला भुला के नवा तरीका ले संबंध ला सुधारे के सीख देथे।
मुख्यमंत्री श्री साय ह कहिन के रायपुर प्रेस क्लब म तिहार मन ला मिल-जुल के मनाय के एक गौरवशाली परंपरा रहे हे। रायपुर प्रेस क्लब ह कइ बछर ले होली मिलन अउ सांस्कृतिक आयोजन के माध्यम ले समाजिक सद्भाव ला बगराये के काम करत हे, ए परंपरा ह आघू घलो अइसने चलत रहना चाही। उमन प्रेस क्लब परिवार के आभार मानत कामना करिन के ए उल्लास के तिहार ह सब्बो के जिनगी म नवा ऊर्जा, उत्साह अउ सकारात्मकता लेके आवय।
ए बेरा म रायपुर प्रेस क्लब के सदस्य मन ह मुख्यमंत्री श्री साय के अनूठा तरीका ले मिर्ची के माला पहिरा के अउ त्रिशूल कस पिचकारी भेंट करके सुग्घर अगवानी करिन। मुख्यमंत्री ह प्रेस क्लब के होली विशेषांक ‘सेंसलेस टाइम्स’ के विमोचन घलो करिन।
मुख्यमंत्री श्री साय ह बजाइन नगाड़ा, रंग के उल्लास म झूमीन पत्रकार
होली मिलन समारोह म उमंग के एक अजबे नजारा देखे ला मिलिस, जब मुख्यमंत्री श्री विष्णु देव साय ह खुद नगाड़ा बजाके उत्सव के जोस ला दुगुना कर दीन। मुख्यमंत्री के नगाड़ा बजातेच समारोह म आय पत्रकार अउ मेहमान मन ह ताली बजाके उत्साह देखाइन अउ पूरा माहौल म खुसी छा गे। पारंपरिक ढोल-नगाड़ा के धुन म मुख्यमंत्री घलो पत्रकार संगवारी मन के संग फाग गीत अउ होली के रंग म रंग गीन। कार्यक्रम म संगीत, संस्कृति अउ आपसी भाईचारा के सुंदर मिलन देखे ला मिलिस।
ए मउका म मुख्यमंत्री के मीडिया सलाहकार श्री पंकज झा, मुख्यमंत्री के सलाहकार श्री आर कृष्णा दास, राजनांदगांव सांसद श्री संतोष पांडेय, विधायक श्री सुनील सोनी, श्री मोतीलाल साहू, रायपुर प्रेस क्लब अध्यक्ष श्री मोहन तिवारी संग आन पत्रकार मन, जनप्रतिनिधि, अधिकारी अउ गनमान्य नागरिक उपस्थित रहिन।
