जगदलपुर कलेक्टोरेट म सजे स्व-सहायता समूह मन के खास स्टॉल
जगदलपुर, रंग के बड़का तिहार होली के आहट के संग बस्तर म उत्सव के माहौल बन गए हवय। ए बछर होली ला सुरक्षित अउ स्थानीय हुनर के संग यादगार बनाय बर जगदलपुर के कलेक्टोरेट परिसर म महिला स्व-सहायता समूह डहर ले तइयार करे गे हर्बल गुलाल अउ फैंसी सामान मन ल बेंचे बर खास स्टॉल लगाय गे हवय। ए स्टॉल मन के सबले बड़े विशेषता ए हवय के इहाँ मिलत गुलाल ह पूरा प्राकृतिक चीज मन ले बने हवय, जेकर ले रसायन के कोनो खराब असर नइ होवय अउ ए ह चमड़ी बर घलो पूरा सुरक्षित हवय।
परिसर म सजे ए स्टॉल मन म न केवल अलग-अलग रंग के खुशबूदार हर्बल गुलाल मिलत हवय, बल्कि होली बर खास फैंसी सामान अउ लइका मन के मनभावन चीज मन घलो हवय। जिला प्रशासन के ए कोसिस ले एक डहर आम मनखे मन ला सुध अउ बिना मिलावट वाले रंग के विक्लप मिलत हवय, त ओखरे संग दूसर कोती स्थानीय महिला मन ला आत्मनिर्भर बनाय बर एक मजबूत मंच घलो मिले हवय। स्थानीय संसाधन अउ फूल-पान के अर्क ले तइयार ए गुलाल ह बस्तर के माटी के खुशबू ला तिहार के उल्लास म घोलत हवय।
प्रशासन अउ स्व-सहायता समूह मन ह सहर के सियान मनखे, सामाजिक संगठन अउ अधिकारी-करमचारी मन ले बिनती करे हें के उमन जादा ले जादा संख्या म ए स्टॉल म आवंय। आप मन मन के एक ठन छोट कन खरीदी ह न केवल आप मन के होली ला रंग म सराबोर करही, बल्कि बस्तर के मिहनती महिला मन के जिनगी म घलो आर्थिक तरक्की अउ खुसी के नवा रंग भरही। ‘वोकल फॉर लोकल’ के संकल्प ला पूरा करत ए पइत के होली ला प्राकृतिक रंग अउ स्थानीय मया के संग मनाय बर मनखे मन ला नेवता देहे गे हवय।
