हर्बल गुलाल बनाय ले आत्मनिर्भर बनिन झाटीबिन के दीदी मन
कोंडागांव, जिला के फरसगांव विकासखंड के ग्राम पंचायत झाटीबिन के महिला मन ह राष्ट्रीय ग्रामीण आजीविका मिशन “बिहान” के माध्यम ले आत्मनिर्भरता के एक सुग्घर मिसाल पेस करे हें। बछर 2011 म ग्रामीण विकास मंत्रालय, भारत सरकार डहर ले सुरू करे गे ए योजना के उदेस्य ग्रामीण महिला मन ला स्व-सहायता समूह के संग जोर के आर्थिक रूप ले मजबूत बनाना हे।
ग्राम झाटीबिन के शीतला स्व-सहायता समूह के अध्यक्ष सुशीला अउ सचिव सुमित्रा के अगुवाई म 02 फरवरी 2020 ले हर्बल गुलाल बनाय के काम सुरू करे गीस। समूह ला बैंक लिंकेज के माध्यम ले 2 लाख रुपिया के आर्थिक मदद मिलिस। अभी तक समूह ह 3,09,900 रुपिया के लागत ले हर्बल गुलाल बनाके 5,20,300 रुपिया के कमाई करे हवय, जेकर ले 2,10,400 रुपिया के सुध लाभ मिले हवय।
ए बछर होली के तिहार ला देखत समूह के महिला मन ह 72,750 रुपिया के लागत ले लगभग 5 कुंटल हर्बल गुलाल तइयार करे हें। प्राकृतिक फूल अउ वनस्पति मन ले बने ए गुलाल ह रसायन ले दूर, चमड़ी बर सुरक्षित अउ पर्यावरण बर घलो बने हवय। रासायनिक रंग के तुलना म हर्बल गुलाल ले चमड़ी म एलर्जी, जलन या आंखी ला नुकसान होय के डर कम रहिथे। संगे-संग ए ह माटी अउ पानी ला घलो गंदा नइ करे, जेकर ले पर्यावरण के बचाव ला बढ़ावा मिलथे।
सादा घर-गिरिस्ती चलइया ले सफल उद्यमी बने तक के ए सफर ह महिला मन के मिहनत, आतम-बिसवास अउ मिल-जुल के करे गे कोसिस के फल ए। राष्ट्रीय ग्रामीण आजीविका मिशन ह उमन ला न केवल रोजगार दे हवय, बल्कि परिवार के आर्थिक हालत ला सुधारे के एक मजबूत रद्दा घलो दे हवय।
ए होली म अपन मन के संग हर्बल गुलाल ले रंग के तिहार मनावव अउ स्थानीय स्व-सहायता समूह मन के बनाय सामान ला अपन के महिला सशक्तिकरण ला सहारा देवव।
