मुंगेली जिला के एक महतारी ह ‘महतारी वंदन योजना’ के पइसा ले न केवल अपन छोटे व्यापार ला बढ़ाइन, बल्कि अपन बेटी के भविष्य ला घलो सुरक्षित करे के रद्दा खोज लीन। सुनीता साहू के ए कहानी ह बताथे के कइसे एक छोट कन मदद ले बड़े बदलाव आ सकथे।
मुंगेली, छत्तीसगढ़ सरकार के महतारी वंदन योजना ह महिला मन ला आर्थिक रूप ले मजबूत बनाय बर एक बढ़िया पहल बन के आगू आवत हे। ए योजना के तहत मिलइया सरलग पइसा ले महतारी मन न केवल आत्मनिर्भर बनत हें, बल्कि अपन परिवार के भविष्य ला घलो सँवारत हें।
मुंगेली जिला के सुनीता साहू एकर एक सुग्घर मिसाल आय। सुनीता ह अपन क्षेत्र म एक ठन छोट कन फैंसी स्टोर चलाथे। पहिली साधन के कमी के सेती ओमन ला अपन काम ला बढ़ाय म मुस्किल होवत रहिस। फेर महतारी वंदन योजना के तहत हर महिना मिलइया एक हजार रूपया के मदद ह ओखर बर नवा रस्ता खोल देहे हे।
सुनीता ह बताइस के योजना ले मिलइया पइसा ले ओमन अपन स्टोर बर नवा-नवा सामान बिसाथें। एकर ले दुकान म ग्राहक मन ला जादा सामान देखे बर मिलथे अउ बिक्री घलो बाढ़ गे हे। धीरे-धीरे ओखर छोट कन काम ह अब बढ़िया तरीका ले आगू बढ़त हे। सुनीता ह सिरिफ़ व्यापार ही नइ बढ़ावत हे, बल्कि अपन बेटी के भविष्य ला सुरक्षित करे बर घलो कदम उठावत हे। फैंसी स्टोर ले होवइया कमाई के एक हिस्सा ला ओमन नियम ले ‘सुकन्या समृद्धि योजना’ के तहत अपन बेटी के खाता म जमा करथे, ताकि ओखर पढ़ाई अउ भविष्य के जरूरत बर पइसा के कोनो कमी झन होय। सुनीता के कहना हे के महतारी वंदन योजना ह ओमन ला आर्थिक मदद के संगे-संग आत्मविश्वास घलो देहे हे। ओमन ए योजना बर मुख्यमंत्री विष्णुदेव साय, उपमुख्यमंत्री अरुण साव अउ शासन-प्रशासन ला धन्यबाद देहे हे।
