सरलग मिलइया आर्थिक मदद ले लइका मन के पढ़इ, पोसन अउ भविष्य ल मिलत हे नवा रस्ता
सूरजपुर, छत्तीसगढ़ सरकार के योजना महतारी वंदन योजना ह प्रदेस के लाखों माई लोगन मन के जीवन म बने बदलाव लावत हे। ये योजना ह सिरिफ़ पइसा के मदद करे के जरिया नोहे, बल्कि माई लोगन मन के आत्मसम्मान, आर्थिक मजबूती अउ परिवार के सुख-संतोस के मजबूत अधार बनके आगू आए हे। योजना के माध्यम ले मिलइया महीना के सहायता रासि ह माई लोगन मन ल परिवार के जरूरत मन ल पूरा करे, लइका मन के पढ़इ अउ पोसन ऊपर ध्यान देहे अउ घर-दुआर के काम-बूता ल जादा भरोसा के संग निभाए म मदद करत हे।
सूरजपुर जिला के प्रतापपुर विकासखंड के रहइया श्रीमती श्यामपति घलो ओ माई लोगन मन म सामिल हे, जिंखर जीवन म महतारी वंदन योजना ह नवा आस जगाए हे। ओ ल हर महीना 1000 रुपिया के सहायता रासि मिलथे, जेखर उपयोग ओ अपन लइका मन के पढ़ई-लिखई, पोसन, स्वास्थ्य संबंधी जरूरत अउ घर-परिवार के रोज के खरचा मन ल पूरा करे म करथे।
श्रीमती श्यामपति ह बताथें के पहिली परिवार के जरूरत मन ल पूरा करे अउ लइका मन के पढ़ाई म नियम से खरचा करे म कइ पइत अकबकासी लग जाए। फेर अब हर महीना मिलइया सहायता रासि ले लइका मन बर कॉपी-किताब, पढ़ई के आन समान अउ सुघर पौष्टिक भोजन के ब्यवस्था करना असान होगे हे। एखर से न केवल हमर बोझा कम होए हे, बल्कि लइका मन के बने भविष्य ल लेके भरोसा घलो मजबूत होए हे। ओ कहिथे के महतारी वंदन योजना ह ओ ल आर्थिक मदद के संगे-संग अपन उपर भरोसा घलो जगाए हे। अब ओ परिवार के जरूरत मन म अपन बने भागीदारी निभावत हे अउ जरूरत परे म लइका मन के छोटे-बड़े संसो ल बिना कोनो संकोच के पूरा कर पावत हे। योजना ले मिलइया सहायता रासि ह परिवार बर बड़ संबल बनगे हे।
महतारी वंदन योजना के लाभ आज प्रदेस के लाखों माई लोगन मन तक पहुंचत हे। जून 2026 म जारी 28वां किस्त के संग योजना के तहत माई लोगन मन ल अब तक 18 हजार 165.19 करोड़ रुपिया ले जादा के सहायता रासि बंटा गए हे। ये रासि ह माई लोगन मन ल आर्थिक रूप ले मजबूत बनाए के संगे-संग परिवार मन के सामाजिक अउ आर्थिक जीवन स्तर ल बने बनाए म घलो बड़का भूमिका निभावत हे।
श्रीमती श्यामपति के मानना हे के ये योजना ह सिरिफ़ आर्थिक मदद नोहे, बल्कि माई लोगन मन के सम्मान अउ आत्मनिर्भरता के चिन्हारी ये। ओमन मुख्यमंत्री श्री विष्णु देव साय अउ महिला एवं बाल विकास मंत्री श्रीमती लक्ष्मी राजवाड़े के प्रति आभार पेस करत कहिन के महतारी वंदन योजना ह प्रदेस के दाई अउ बहिनी मन ल नवा ताकत, नवा भरोसा अउ सुग्घर भविष्य के आस देहे हे।
