मउहा आधारित चीज मन ले आदिवासी माई लोगन मन ल मिलीस नवा चिनहारी अउ आत्मनिर्भरता
राजनांदगांव, मउहा ले बढ़ोतरी के रस्ता के मूल उदेस्य परम्परागत अउ दवई के गुन वाले मउहा के वैज्ञानिक संग्रहण अउ मूल्यवर्धन के माध्यम ले गांव के अउ आदिवासी अर्थव्यवस्था ल मजबूत करना हे। एला कमई अउ रोजगार के एक पक्का जरिया बनाए जात हे। मुख्यमंत्री श्री विष्णुदेव साय के अगुवाई म वनोपज आधारित आजीविका ल बढ़ावा देहे खातिर राजनांदगांव जिला के वन धन विकास केंद्र (वीडीवीके) कौरिनभाठा ह माई लोगन मन ल मजबूत करे अउ ग्रामीन अर्थव्यवस्था ल ठोस करे के एक सुघर मिसाल बनके आगू आए हे। मउहा आधारित मूल्य संवर्धित चीज मन के निरमान ले इहां के आदिवासी माई लोगन मन ल रोजगार, सनमान अउ आत्मनिर्भरता के नवा मौका मिले हे।
प्रशिक्षण ले बाढ़िस गुन, मिलीस नवा बजार
छत्तीसगढ़ राज्य लघु वनोपज संघ के सहयोग ले चलत ये केंद्र म महिला स्व-सहायता समूह मन ल आधुनिक खाद्य प्रसंस्करण, पैकेजिंग, ब्रांडिंग अउ विपणन के सिखोना देहे गीस। नामी संसथान सीएफटीआरआई मैसूर अउ सिफेट लुधियाना ले मिले तकनीकी सलाह ह माई लोगन मन के कउसल ल नवा रस्ता दीस।
मउहा अउ मिलेट्स ले तियार होवत हे सुघर जिनिस
मउहा अउ मिलेट्स ल मिलाके कुकीज़, ब्राउनी अउ पैनकेक बनाए जात हें। केंद्र ले जुड़े माई लोगन मन स्थानीय स्तर म मिलइया मउहा अउ मिलेट्स के उपयोग करके मउहा लड्डू, मउहा स्क्वैश, मउहा अचार, मउहा एनर्जी बार, मउहा कुकीज़, मउहा जैम अउ मिलेट कुकीज़ जइसे जिनिस तियार करत हें। पौष्टिकता, गुन अउ प्राकृतिक सुवाद के सेती ये जिनिस मन के मांग सरलग बाढ़त हे। एखर बिकी, खुदरा बिकी केंद्र मन अउ ऑनलाइन माघ्यम ले करे जात हे।
कमई म बढ़ोतरी ले मजबूत होईस आजीविका
ये ह आयरन, विटामिन अउ कैल्शियम ले भरे एक सुपरफूड हे, एखर से प्राकृतिक सिरप, मूसली अउ शहद जइसे चीज मन तैयार होवत हे जेकर उपयोग सुगर के मरीज मन बर घलो बने हे। ये उदीम ह छेत्र के आदिवासी माई लोगन मन बर पक्का रोजगार अउ कमई के मौका बनाए हे। परम्परागत वनोपज ल बजार के मांग के मुताबिक सुग्घर उत्पाद मन म बदलके माई लोगन मन आर्थिक रूप ले मजबूत बने हें अउ दूसर समूह मन बर प्रेरणा के सोत बनत हें।
1.26 करोड़ रुपिया ले जादा के व्यापार
वन धन विकास केंद्र कौरिनभाठा ह बछर 2020 ले मार्च 2026 तक लगभग 1.26 करोड़ रुपिया के कुल बिकी करे हे। ये बखत म समूह ल लगभग 3.41 लाख रुपिया के लाभ अउ कमीशन मिले हे। ये सफलता ह देखाथे के वनोपज आधारित व्यापार ह गांव कोति आर्थिक बढ़ोतरी के एक बड़का माध्यम बन सकत हे।
