सूरजपुर, राज्य सरकार डहर ले किसान मन ला उन्नत अउ आधुनिक खेती के तकनीक मन ले जोड़े के उदीम के सुघर असर प्रदेस के गांव कोति दिखत हे। नैनो खातू मन के उपयोग ले किसान ह कम साधन म घलो अउ अच्छा उत्पादन पावत हें अउ खेती ला अउ जादा नफा वाले बनावत हें।
सूरजपुर जिला के गाम ऊँचडीह के बैगापारा के रहइया किसान श्री देवराज सिंह एकर एक प्रेरक उदाहरन हें, जेमन ह नैनो यूरिया के सफल उपयोग ले अपन खेती म बड़का परिणाम हासिल करे हें।
लगभग 2.50 एकड़ खेती के भुइँया म खेती करइया श्री देवराज सिंह ह पाछू दू बछर ले धान अउ साक-सब्जी के फसल मन म नैनो यूरिया के उपयोग करत हें। उनकर अनुभव हे के नैनो यूरिया के प्रयोग ले फसल मन के बढ़वार अब्बड़ सुग्घर होथे अउ उत्पादन के संग गुणवत्ता दुनों म सुघर सुधार देखे बर मिलथे। धान के फसल म अच्छा गुणवत्ता वाले अउ गरु बाली मिलत हे, उहें साक-सब्जी के फसल मन म घलो संतोसजनक परिणाम मिले हे।
वोमन बताइन के प्रदेस म सहकारी समिति मन अउ अधिकारिक दुकान के माध्यम ले नैनो यूरिया, नैनो डीएपी के संग अलग-अलग खातू मन के मिलना ठउका करे जात हे, जेकर से किसान मन ला समे पर खेती के समान मिल जात हे। एकर से खेती-किसानी के काम मन म सुबिधा अउ तेजी दुनों बाढे हे।
श्री देवराज सिंह के मुताबिक नैनो यूरिया के उपयोग ह जुन्ना दानेदार यूरिया के तुलना म अब्बड़ सुबिधाजनक हे। दूरिहा के खेत मन तक बड़ मात्रा म बोरा वाले खातू पहुंचाए के चुनौती ला नैनो यूरिया ह कतकोन हद तक असान बना देहे हे। एकर छोट कन बोतल ला असानी से खेत तक ले जाए जा सकथे अउ स्प्रे के माध्यम ले फसल मन ऊपर छिंच के उपयोग करे जा सकथे, जेकर से समे अउ मिहनत दोनों के बचत होथे।
वोमन किसान मन ले बैज्ञानिक कृषि तरीका मन ला अपनाए अउ नैनो खातू मन के उपयोग ला बढ़ावा देहे के बिनती करिन। उनकर मानना हे के आधुनिक तकनीक मन के प्रयोग ले फसल मन के गुणवत्ता म सुधार, अउ अच्छा उत्पादन अउ खेती के खरच ला सँभाले म मदद मिल सकथे।
नैनो यूरिया ले बाढ़िस उपज, किसान मन बर प्रेरणा बनिस देवराज सिंह
