छत्तीसगढ़ म मध्यप्रदेश, महाराष्ट्र अउ झारखंड के तुलना म सस्ता बिजली
बीते बछर म महँगाई, कोयला, बिजली उत्पादन अउ आपूर्ति लागत म बाढ़ ला देखत विद्युत टैरिफ दर मन म करे गे हे मामूली बढ़ोतरी
रायपुर, छत्तीसगढ़ राज्य विद्युत नियामक आयोग ह वित्तीय बछर 2026-27 बर नवा बिजली दर मन के घोषणा करे हे। नवा दर मन 1 जुलाई 2026 ले लागू होही। आयोग ह बिजली बिल म औसतन 6.23 प्रतिसत के बढ़ोतरी करे हे। आयोग के कहना हे के पाछू बछर मन म बाढ़े महँगाई, कोयला, बिजली उत्पादन अउ आपूर्ति लागत तथा पहिली के बछर मन के घाटा के भरपाई ला देखत ये मामूली बढ़ोतरी, जरूरी अउ न्यायसंगत हे।
घरेलू उपभोक्ता मन बर बिजली दर मन म औसतन 30 पइसा प्रति यूनिट के बढ़ोतरी करे गे हे। हालांकि खपत के अलग-अलग स्लैब के हिसाब से ये बढ़ोतरी 30 ले 50 पइसा प्रति यूनिट तक रइही। सुन्न (0) ले 200 यूनिट तक खपत करइया उपभोक्ता मन बर 30 पइसा प्रति यूनिट, 201 ले 600 यूनिट तक खपत करइया मन बर 40 पइसा प्रति यूनिट अउ 600 यूनिट ले जादा खपत करइया मन बर 50 पइसा प्रति यूनिट के बढ़ोतरी तय करे गे हे। राज्य के लाखन परिवार मन ऊपर बाढ़े टैरिफ के असली असर सिरिफ 15 ले 20 पइसा प्रति यूनिट के आस-पास होही। टैरिफ बढ़ावत समें आयोग ह आम जनता अउ कम आय वाले मनखे मन के हित के ध्यान रखे हे।
सरकार के मुख्यमंत्री ऊर्जा राहत योजना के तहत 400 यूनिट तक बिजली खरच करइया उपभोक्ता मन ला 200 यूनिट तक के खपत ऊपर आधा बिजली बिल देय के सुभीता मिलत हे। अइसन म बड़े संख्या म कम अउ मध्यम आय वर्ग के परिवार मन ऊपर असली अतिरिक्त भार कम रइही। अनुमान हे के ये उपभोक्ता मन के बिल ऊपर असर औसतन सिरिफ 15 ले 20 पइसा प्रति यूनिट के बराबर होही।
इही किसम ले 201 ले 600 यूनिट तक बिजली खरच करइया कतको उपभोक्ता पीएम सूर्यघर योजना के तहत छत ऊपर सोलर संयंत्र (रूफटॉप सोलर) लगाके अपन ग्रिड आधारित खपत ला 400 यूनिट के भितरी करत हें। अइसन उपभोक्ता मन ऊपर घलो बढ़ोतरी के असर बहुत कम होय के संभावना हे।
गैर-घरेलू उपभोक्ता मन के बिजली दर मन म औसतन 20 ले 40 पइसा प्रति यूनिट के बढ़ोतरी करे गे हे। खेती-किसानी के पंप मन बर दर मन म 40 पइसा प्रति यूनिट के बढ़ोतरी घोषित करे गे हे। हालांकि किसान उपभोक्ता मन ला राज्य सरकार कोति ले मिलइया सब्सिडी के सेती ये बढ़ोतरी के सीधा असर किसान मन ऊपर नइ परय।
उच्च दाब (एचटी) के अउद्योगिक उपभोक्ता मन बर घलो बिजली दर मन म संसोधन करे गे हे। 220 केवी अउ 132 केवी श्रेणी म ऊर्जा प्रभार म 30 पइसा प्रति यूनिट अउ डिमांड चार्ज म 25 रुपिया प्रति केवीए के बढ़ोतरी करे गे हे। 33 केवी श्रेणी म 40 पइसा प्रति यूनिट अउ 11 केवी श्रेणी म 30 पइसा प्रति यूनिट के बढ़ोतरी लागू होही।
नवा टैरिफ ब्यवस्था म कुछू बिसेस छूट घलो देहे गे हे। बस्तर अउ सरगुजा इलाका के आदिवासी बिकास प्राधिकरण इलाका मन म बने छात्रावास मन ला ब्यावसायिक श्रेणी के बलदा घरेलू श्रेणी म सामिल करके राहत देहे गे हे। एकर अलावा बेरा टरे के बाद भुगतान करे म लगइया सरचार्ज के ब्यवस्था ला घलो उपभोक्ता मन के हित म अरामदेह बनाये गे हे। अब जादा फीस सिरिफ ओतकी दिन बर लगही जतका दिन के असली बिलम होय रइही। घरेलू अउ गैर-घरेलू श्रेणी के 10 किलोवाट ले जादा भार वाले उपभोक्ता मन ला ऑफ-पीक बेरा म बिजली खरच करे ऊपर 20 पइसा प्रति यूनिट के छूट घलो मिलही।
आयोग के मुताबिक संसोधित दर मन के बाद घलो छत्तीसगढ़ म बिजली के दाम पड़ोसी राज्य मध्य प्रदेश, महाराष्ट्र अउ झारखंड के तुलना म अभी घलो कम हे। अइसन म राज्य म उपभोक्ता मन अउ उद्योग मन बर बिजली दर मन प्रतिस्पर्धी बने रइही। कुल मिलाके, बिजली दर मन म बढ़ोतरी जरूर होए हे, फेर राहत योजना मन, सब्सिडी अउ सौर ऊर्जा ला बढ़ावा देइया नीति मन के सेती आम घरेलू उपभोक्ता मन ऊपर एकर असर कम होही।
