रायगढ़ म बंद पड़े बायोगैस संयंत्र होइस फेर चालू, साफ-सुथरा ऊर्जा अउ पर्यावरण संरक्षण ला बढ़ावा मिलही
रायगढ़, गोबर गैस संयंत्र मन के पुनर्जीवन ग्रामीण भारत म ऊर्जा आत्मनिर्भरता पाये के दिसा म एक बहुत बढ़िया अउ असरदार कदम हे। ये गाँव मन ला एलपीजी (LPG) ऊपर निर्भरता ले मुक्त कराके पर्यावरण के अनुकूल साफ-सुथरा ऊर्जा, आत्मनिर्भर अर्थव्यवस्था अउ खेती-किसानी बर सबले अच्छा जैविक खाद देवत हे। राज्य म बायोगैस संयंत्र मन के पुनर्जीवन अउ सही ढंग से संचालन के ये पहल ग्रामीण विकास, साफ-सुथरा ऊर्जा के विस्तार, पर्यावरण के सुरक्षा अउ आत्मनिर्भर गाँव मन के सपना ला पूरा करे के दिसा म एक ठन महत्वपूर्ण कदम साबित होवत हे।
बड़े देवगांव म बने गोबर गैस (बायोगैस) संयंत्र ला फेर से करे गीस चालू
छत्तीसगढ़ म ग्रामीण इलाका मन ला साफ-सुथरा, सस्ता अउ सरलग मिलेइया ऊर्जा उपलब्ध करावे के दिसा म महत्वपूर्ण पहल करत हुये रायगढ़ जिला के ग्राम बड़े देवगांव (जनपद पंचायत खरसिया) म बने गोबर गैस (बायोगैस) संयंत्र ला फेर चालू करे गे हे। ये पहल राज्य म नवीकरणीय ऊर्जा (renewable energy) के विस्तार, जैविक कचरा मन के वैज्ञानिक ढंग से निपटारा अउ ग्रामीण ऊर्जा आत्मनिर्भरता ला मजबूत करे के दिसा म एक बड़का कदम माने जात हे।
बायोगैस ले चूल्हा जलाके गैस के परीच्छन पूरा सफल
मुख्य कार्यपालन अधिकारी, जिला पंचायत रायगढ़ के देख-रेख म संयंत्र के पूरा जाँच अउ तकनीकी परीच्छन करे गीस। जाँच के बखत क्रेडा (CREDA) के तकनीकी टीम, जिला पंचायत के अधिकारी अउ ग्राम पंचायत के प्रतिनिधि मन ह मिलके संयंत्र के हालत ला देखिन अउ जरूरी सुधार तथा मरम्मत के काम ला पूरा कराइन। एकर बाद संयंत्र ला सफलता के संग फेर चालू करके बायोगैस ले चूलहा सिपचाके गैस आपूर्ति के गुणवत्ता अउ कार्यक्षमता के परीच्छन करे गीस, जे एकदम सफल रहिस।
घरेलू ईंधन के सुभीता ले उपलब्धता होही तय
अधिकारी मन ह बताइन के राज्य सरकार ग्रामीण इलाका मन म साफ-सुथरा ऊर्जा स्रोत ला बढ़ावा देहे बर बायोगैस संयंत्र मन के देख-रेख, तकनीकी जाँच अउ ओकर पुनर्जीवन ऊपर बिसेस ध्यान देवत हे। एकर से ग्रामीण परिवार मन ला घरेलू ईंधन के सुभीता ले उपलब्धता तय होही, एलपीजी ऊपर निर्भरता कम होही अउ ऊर्जा ऊपर होइया खरच म घलो कमी आही।
गोबर अउ जैविक कचरा मन ले बनही बायोगैस
बायोगैस संयंत्र मन सिरिफ साफ-सुथरा ईंधन भर नई देवत हें, भलुक गोबर अउ दूसर जैविक कचरा मन के सही निपटारा के माध्यम ले पर्यावरण के सुरक्षा म घलो बड़े भूमिका निभावत हें। संयंत्र मन ले मिलइया जैविक खाद खेती-किसानी के उपज बढ़ाए म घलो मददगार साबित होथे, जेकर से किसान मन ला जादा लाभ मिलथे।
ग्रामीण मन ला मिलही साफ-सुथरा ईंधन के सुभीता
ये मौका म हितग्राही मन अउ ग्रामीण मन ला संयंत्र ला सरलग चलाए, गोबर के तय मात्रा म आपूर्ति करे, पाइपलाइन के बेरा-बेरा म जाँच करे अउ तकनीकी समस्या मन के तुरंते सूचना देहे के संबंध म जरूरी जानकारी घलो देहे गीस। ग्रामीण मन ह संयंत्र के फेर शुरू होय ऊपर खुसी जतावत कहिन के एकर ले ओमन ला साफ-सुथरा ईंधन के सुभीता मिलही, जुन्ना किसम के ईंधन मन ऊपर निर्भरता कम होही अउ घरेलू खरचा म घलो बचत होही।
