सीएम हेल्पलाइन बनिस आमजन के समस्या मन के लउहेत समाधान के प्रभावी माध्यम
रायगढ़, मुख्यमंत्री के जनता कोति धियान देहे वाले सुशासन ब्यवस्था के तहत चलत सीएम हेल्पलाइन 1076 आम नागरिक मन के समस्या के तुरते समाधान बर एक बड़का माध्यम बनत हे। रायगढ़ जिला के लैलूंगा विकासखंड म दरज एक सिकायत के तुरते निपटारा करत पात्र हितग्राही ला प्रधानमंत्री उज्ज्वला योजना के अंतर्गत गैस कनेक्शन देहे गीस। लैलूंगा सहर के संत कबीर वार्ड नंबर-7 के रहइया श्री धनेश्वर हा अपन घरवाली श्रीमती भगवती चंद्रा के नाम से प्रधानमंत्री उज्ज्वला योजना के तहत गैस कनेक्शन बर आवेदन करे रहिस। तय समय बीत जाय के बाद घलो गैस कनेक्शन नइ मिले म ओ ह अपन समस्या के समाधान बर सीएम हेल्पलाइन 1076 म सिकायत दरज कराइस।
सिकायत मिलतेच जिला खाद्य नियंत्रक आफिस अउ ओकर से जुड़े खाद्य निरीक्षक डहर ले ए मामला के गंभीरता से जांच करे गीस। जांच म पाये गीस के अवेदिका के नाम से उज्ज्वला योजना के अंतर्गत गैस कनेक्शन मंजूर हो गए रहिस, फेर तकनीकी अउ सरकारी काम के सेती ओकर लाभ हितग्राही तक नइ पहुंच पाय रहिस। मामला साफ होय के बाद खाद्य विभाग हा तुरते कारवाही करत नियम के मुताबिक हितग्राही ला गैस कनेक्शन दे दीस। एकर संगेच सिकायत के सुग्घर निराकरण करके मामला ला बंद करे गीस।
गैस कनेक्शन मिल जाय के बाद हितग्राही श्री धनेश्वर हा बड़ खुस होइस अउ मुख्यमंत्री, जिला प्रशासन अउ खाद्य विभाग के आभार जताइस। ओ ह कहिस के सीएम हेल्पलाइन के माध्यम से ओकर समस्या के समय म समाधान होइस अउ ओला शासन के योजना के लाभ आसानी से मिल गीस। ए मामला हा देखाथे के सीएम हेल्पलाइन 1076 शासन अउ आम जनता के बीच बातचीत के एक मजबूत माध्यम बन चुके हे। जिला प्रशासन कोति सिकायत मन के सुग्घर अउ समय म निराकरण करे के रस्ता म सरलग उदीम करे जात हे, जेकर से पात्र हितग्राही मन तक शासन के योजना मन के लाभ पारदर्शी अउ सही तरीका से पहुंचत हे।
