परसिक्छन अउ चौपाल के माध्यम ले किसान मन ला दहे जावत हे आधुनिक खेती के जानकारी
सूरजपुर, माँ महामाया सहकारी शक्कर कारखाना मर्यादित, केरता कोति ले सूरजपुर कलेक्टर श्रीमती रेना जमील के कहिबे म गन्ना उपजइया किसान मन ला आधुनिक अउ वैज्ञानिक खेती के तकनीक मन ले जोड़े खातिर छेत्र के अलग-अलग गांव मन म परसिक्छन अउ किसान चौपाल के आयोजन करे जावत हे।
ए बुता के उदेस्य गन्ना के उपज ला बढ़ाना, लागत ला कम करना अउ किसान मन के कमाई ला बढ़ाना आय। कारखाना छेत्र के भितरी आवइया सूरजपुर, बलरामपुर अउ सरगुजा जिला के 267 गांव के गन्ना उपजइया किसान मन ला उन्नत खेती के नवा-नवा तकनीक मन के जानकारी देहे जात हे।
ए परसिक्छन कारयकरम मन म किसान मन ला बने किसम के बीज के चुनाव, नपा-तोल खाद के परबंधन, पानी बचाना अउ सिंचई के बैगियानिक तरीका, कीरा-मकोड़ा अउ बेमारी के रोकथाम तउ बढ़िया उपज बर आधुनिक कृषि तकनीक मन के गहिर जानकारी बिसेसग्य मन कोति ले देहे जात हे। गांव परसवार, मायापुर-1, बैकोना, पोडिया, बगड़ा, मायापुर-2, सुन्दरगंज, दुप्पी, रेवतपुर, कुंदीकला, अखोराखुर्द, टुकुडांड, पोपरंगा, महोरा, धरमपुर अउ रुखपुर संग दूसर गांव मन म लगे चौपाल मन म किसान मन ह उछाह के संग भाग लीन।
परसिक्छन के संगे-संग किसान मन ला गन्ना के खेत मन म ले जाके देखाय अउ समझाय घलो जात हे। ए बखत कतार ले कतार के सही दूरी, तुरते अउ जादा उपज देवइया उन्नत किसम के बिजहा के प्रयोग अउ कीरा-बेमारी के पहिचान अउ ओकर अचूक रोकथाम के उपाय मन ला बताय जात हे। कारखाना प्रबंधन ह किसान मन ले आधुनिक तकनीक मन ला अपनाके जादा उपज अउ बढ़िया गुणवत्ता वाले गन्ना तियार करे खातिर गिलौली करत हे, जेकर ले छेत्र म गन्ना के उपज के संग किसान मन के आरथिक समरिद्धि ला घलो नवा गति मिल सकय।
