125 दिन के रोजगार, 300 रुपिया रोज के मजदूरी अउ मेट के जिम्मेदारी ले बाढ़ीस आत्मविश्वास
राजनांदगांव, सासन के ‘विकसित भारत-जीरामजी (ग्रामीण रोजगार गारंटी एवं आजीविका मिशन) योजना’ दिव्यांगजन मन के जीवन म सुघर बदलाव लावत हे। ए योजना ले ओमन ला जादा रोजगार, बने मजदूरी अउ जिम्मेदारी वाला काम मिलत हे। पहिली जिहां मनरेगा के तहत 100 दिन के रोजगार मिलत रहिस, उहें अब वीबी-जीरामजी योजना के अंतर्गत 125 दिन के रोजगार अउ 300 रुपिया रोज के मजदूरी मिलत हे। एकर ले दिव्यांग हितग्राही मन के आय बाढ़े हे अउ उंकर आत्मविश्वास घलो मजबूत होए हे।
राजनांदगांव विकासखंड के सुंदर गांव के रहइया दिव्यांग श्री चंद्रप्रकाश साहू ला वीबी-जीरामजी योजना के तहत 100 मजदूर मन बर मेट के जिम्मेदारी देहे गे हे। ओहा बतइस के पहिली ओला मनरेगा के अंतर्गत 100 दिन के रोजगार मिलत रहिस, फेर अब 125 दिन तक काम अउ 300 रुपिया रोज के मजदूरी मिले ले परिवार के आर्थिक स्थिति मजबूत होवत हे।
ओहा कहिस के मेट के जिम्मेदारी मिलना ओकर बर गरब के बात आय। एकर ले ओला समाज म सम्मान के संग आगे बढ़े के मउका मिले हे।
श्री चंद्रप्रकाश साहू ला राजनांदगांव दउरा के बेरा म जिला के प्रभारी मंत्री श्री गजेन्द्र यादव ह शॉल, श्रीफल अउ प्रतीक चिन्ह देके सम्मानित करिस। ओहा बतइस के ए सम्मान ओकर जीवन के कभू न भुलाय वाला पल आय। एकर से ओकर आत्मविश्वास बाढ़े हे अउ आगे अउ बने काम करे के प्रेरणा मिले हे।
डोंगरगांव विकासखंड के कोहका गांव के दिव्यांग सुश्री रंभा मंडावी ला घलो वीबी-जीरामजी योजना के तहत मेट के काम मिले हे। पहिली ओला मनरेगा म 261 रुपिया रोज के मजदूरी के संग 100 दिन के रोजगार मिलत रहिस। अब ओला 125 दिन के रोजगार अउ 300 रुपये रोज के मजदूरी मिलत हे, जेकर ले ओकर आय बाढ़े हे अउ परिवार ला आर्थिक सहारा मिले हे।
सुश्री रंभा मंडावी ह बतइस के ओहा मेट के रूप म काम करे के संगे-संग गांव के लोगन मन ला सासन के अलग-अलग जनकल्याणकारी योजना मन के जानकारी घलो देथे, ताकि जेन एकर हकदार हें उमन समय म योजना मन के लाभ पा सकंय।
ओला घलो जिला के प्रभारी मंत्री श्री गजेन्द्र यादव ह शॉल, श्रीफल अउ प्रतीक चिन्ह देके सम्मानित करिन। ओहा कहिस के ए सम्मान ले ओकर उत्साह अउ आत्मविश्वास दूनो बाढ़े हे।
दूनो हितग्राही मन ह प्रधानमंत्री श्री नरेन्द्र मोदी अउ मुख्यमंत्री श्री विष्णुदेव साय के प्रति आभार जताइन अउ कहिस के वीबी-जीरामजी योजना ह दिव्यांगजन मन बर सम्मानजनक आजीविका के एक नीक जरिया बनत हे। योजना के तहत बाढ़े काम के दिन, बने मजदूरी अउ जिम्मेदारी वाले दायित्व ह उंकर जीवन म नवा उमीद, आत्मनिर्भरता अउ आर्थिक सुरक्षा के संचार करे हे।
