रोहराकला के स्व-सहायता समूह के महिला मन ह शुरू करिन राखी निर्माण
मुंगेली, राष्ट्रीय ग्रामीण आजीविका मिशन (बिहान) ले जुड़के ग्रामीण महिला मन अब पारंपरिक आजीविका काम ले आगू बढ़त नवाचार के माध्यम ले आत्मनिर्भरता के नवा रद्दा बनावत हें। इही कड़ी म मुंगेली जिला के विकासखण्ड पथरिया के ग्राम रोहराकला के आदर्श महिला स्व-सहायता समूह के महिला मन ह ए बछर पहली पइत चांउर, मूंग, धनिया, काली मिर्च संग कई प्राकृतिक बीजा मन के उपयोग करके आकर्षक अऊ पर्यावरण-अनुकूल राखी तियार करे हें।
पहिली समूह के महिला मन तीर आय के सीमित साधन रहिस। बिहान योजना के माध्यम ले समूह ल रिवॉल्विंग फंड, कम्युनिटी इन्वेस्टमेंट फंड अऊ बैंक लिंकेज के सुविधा मिलिस। विभागीय मार्गदर्शन अऊ क्षमता विकास प्रशिक्षण ले महिला मन के आत्मविश्वास बाढि़स अऊ उमन उपलब्ध स्थानीय संसाधन मन के उपयोग करत राखी निर्माण के नवा काम शुरू करिन। रक्षाबंधन पर्व ल ध्यान म रखत समूह के महिला मन ह अलग-अलग डिजाइन अऊ रंग म हाथ ले बनाए राखी तियार करे हें। प्राकृतिक बीजा मन ले तियार ए राखी मन के खासियत इंकर स्थानीय, आकर्षक अऊ पर्यावरण के अनुकूल होना हे। स्थानीय बाजार म घलोक ए राखी मन ल अच्छा प्रतिक्रिया मिलत हे।
राखी निर्माण ले मिले आय महिला मन के परिवार मन के जरूरत मन ल पूरा करे म सहयोगी बनही। एखर से लइका मन के शिक्षा, स्वास्थ्य अऊ घरेलू जरूरत मन म आर्थिक सहायता मिले के संग महिला मन म बचत, निवेश अऊ स्वरोजगार के भावना घलोक मजबूत होही। आदर्श महिला स्व-सहायता समूह के ए पहल केवल राखी निर्माण तक सीमित नइ हे, बल्कि ए महिला उद्यमिता, स्थानीय संसाधन मन के उपयोग, पर्यावरण संरक्षण अऊ सामूहिक आर्थिक सशक्तिकरण के प्रभावी उदाहरण बनके आगू आए हे। बिहान के सहयोग ले रोहराकला के महिला मन अब अपन हुनर ल बाजार ले जोड़के आत्मनिर्भरता कोति कदम बढ़ावत हें। उंखर ए नवाचार गांव के आन महिला मन अऊ स्व-सहायता समूह मन ल घलोक नवा आजीविका अवसर तलासे बर प्रेरित करत हे।
