दौना गांव के संतोषी डहरिया दू माईलोगन मन ला देवत हवय रोजगार
मुंगेली, मुख्यमंत्री श्री विष्णु देव साय के मनके मुताबिक माईलोगन मन के आर्थिक सशक्तिकरण के उद्देस ले महतारी वंदन योजना चलाए जात हे। सरलग आर्थिक सहायता ह माईलोगन मन ला आत्मनिर्भर बने के रद्दा म नवा उरजा देवत हे। जिला के कतको माईलोगन मन ए रासि के उपयोग स्वरोजगार अउ परिवार के जरूरत मन ला पूरा करे म करत हवयं। इही कड़ी म मुंगेली जिला के पथरिया विकासखण्ड के दौना गांव के श्रीमती संतोषी डहरिया ह घलो घरेच म सिलाई के काम सुरू करिस अउ आज अऊ दू माईलोगन मन ला रोजगार देवत हे। सिलाई मशीन ओकर आत्मनिर्भरता के साधन बन गे हे। घरवाला के बिते के बाद दू छोटे लइका मन के जिम्मेदारी ओकर खांधा म आईस, फेर ओ हा परिस्थिति के आगू हार माने के जगा अपन हुनर ला अपन ताकत बनाइस अउ सिलाई काम ला आजीविका के मजबूत सहारा बना लीस।
संतोषी ह बताइस के महतारी वंदन योजना के रासि ले ओ हा सिलाई के जरूरी सामान बिसाथे, एकर ले आर्थिक मदद मिल जाथे। ओ ला पहिलिच ले सिलाई के काम आवत रहिस, जेखर से ओ हा घर म सिलाई मशीन ले काम सुरू करिस। घर के जिम्मेदारी अउ लइका मन के देख-रेख के संग ओ हा नियमित रूप ले सिलाई के काम करत रहिस। सुरूआती दिन म आय कम रहिस, फेर ओकर भीतर आगू बढ़े के भरोसा मजबूत रहिस। सरलग मेहनत अउ बने काम के सेती धीरे-धीरे ओकर तीर सिलाई के अऊ काम आए लगिस। समय के संग ओ हा अपन घर के आगू म छोट कन सिलाई दुकान सुरू कर लीस। आज इही काम ओकर परिवार के आय के मजबूत आधार बन चुके हे।
