धमतरी, राखी के तिहार भाई-बहिनी के अटूट मया, भरोसा अउ सुरक्षा के वादा के चिनहा ए। ए पवित्र तिहार ले ठीक पहिली विष्णु भैय्या के छत्तीसगढ़ सरकार के ‘महतारी वंदन योजना’ ह जिला के हजारों माईलोगन मन के जिंदगी म स्वाभिमान अउ आर्थिक आत्मनिर्भरता के नवा मिठास घोल देहे हे। योजना के तहत सीधा बैंक खाता मन म पहुंचे रासि बहिनी मन बर सिरीफ एक आर्थिक मदद नो हे, भलुक माईलोगन मन बर अपन ताकत ले तिहार के खुसी मनाए के सशक्त माध्यम बन गे हे।
अब काकरो आगू हाथ फैलाए के जरूरत नई हे
धमतरी जिला के मुजगहन के रहइया मंजू यादव, धमतरी के शिवानी साहू अउ पोटियाडीह के मीनाक्षी निर्मलकर बर ए योजना ओ मन के आत्मसम्मान के सहारा बने हे। मुजगहन के मंजू यादव मुंह म बगरे खुसी के संग बताथे के ए पइत विष्णु भैय्या के भेजे पइसा ले राखी म अपन बर नवा लुगरा बिसाहूं। महतारी वंदन योजना ले मिलइया रासि ले अपन छोटे-छोटे जरूरत मन बर दूसर मन उपर आश्रित नई रहे बर परै। धमतरी के शिवानी साहू अपन अनुभव बतावत कहिथे के पहिली लइका मन बर तिहार म मिठई या छोटे-मोटे सामान लेहे बर घलो दूसर मन के मदद लेहे बर परत रहिस। अब ए रासि ले मय खुद लइका मन बर मिठाई अउ जरूरी सामान बिसात हंव। अइसनहे पोटियाडीह के मीनाक्षी निर्मलकर बर ए तिहार अऊ खास हो गे हे। ओ हा कहिथे, ए पइत अपन भाई मन बर राखी, मिठाई अउ उपहार मय अपन खुद के पइसा ले बिसाहूं। तिहार ले ठीक पहिली मिले ए रासि कोई भाई के अनमोल उपहार ले कम नई हे।
मुख्यमंत्री बर जताईस आभार
लाभार्थी माईलोगन मन ह मुख्यमंत्री श्री विष्णुदेव साय बर मया ले आभार जतावत ओ ला अपन ‘बड़का भाई’ कहिन। माईलोगन मन के कहना हे के हर महीना नियमित मिलइया ए आर्थिक सहायता ले न सिरीफ ओ मन के अपनउपर भरोसा बाढ़े हे, भलुक ओ मन अपन परिवार के जरूरत मन ला पूरा करे म अऊ सक्षम महसूस करत हवंय।
महिला सशक्तिकरण के नवा दौर
महतारी वंदन योजना राज्य म महिला सशक्तिकरण के रददा म एक मील के पत्थर साबित होत हे। नियमित आर्थिक सहारा मिले ले ग्रामीण अउ शहरी क्षेत्र मन के माईलोगन मन अपन खुद के जरूरत, लइका मन के पढ़ाई, घर के खरचा अउ तिहार मन के तियारी ला बिना कोनो पइसा के तंगी के पूरा कर पावत हवंय। राखी के मउका म मिले ए रासि राज्य के माईलोगन मन बर आत्मनिर्भरता, स्वाभिमान अउ आर्थिक सुरक्षा के सच्चा उपहार बनके उभरे हे।
