रायपुर, रायपुर के पुलिस परेड ग्राउंड म 80वां स्वतंत्रता दिवस के मउका म मुख्यमंत्री श्री विष्णु देव साय ह तिरंगा फहराइन अउ जम्मो प्रदेसवासी मन ला बधाई दीन। मुख्यमंत्री ह कहिन के नक्सलवाद के खात्मा के बाद अब छत्तीसगढ़ म शांति, भरोसा अउ विकास के नवा बिहान होवत हे। बस्तर अउ सरगुजा के विकास बर ‘नियद नेल्ला नार 2.0’ अउ ‘बस्तर मुन्ने अभियान’ ले 39 लाख ले जादा मनखे मन तक सरकारी योजना पहुँचत हे। दूर-दराज के लइका मन बर ओरछा अउ जगरगुंडा म एजुकेशन सिटी बनाए जात हे। किसान मन के हित ला सर्वोच्च बतावत मुख्यमंत्री ह कहिन के 3,100 रुपिया प्रति कुंटल के दर ले 21 कुंटल धान बिसाए जात हे अउ फसल विविधीकरण बर 15 हजार रुपिया इनपुट सब्सिडी देहे जात हे। सिंचाई सुविधा के बिस्तार बर 11 हजार करोड़ रुपिया ले जादा के मंजूरी देहे गे हे।
कल्याणकारी योजना मन के चर्चा करत मुख्यमंत्री ह बताइन के प्रदेस म 24.50 लाख पक्का मकान मंजूर हो चुके हे, जेन म रोज औसतन 1,600 मकान बनत हे। महतारी वंदन योजना ले महिला मन ला 19,444 करोड़ रुपिया बांटे गे हे अउ 13.85 लाख दीदी मन ‘लखपति दीदी’ बन चुके हें।
युवा मन बर पारदर्शी भर्ती बर ‘छत्तीसगढ़ कर्मचारी चयन मंडल’ बनाए गे हे अउ सख्त नकल रोधी कानून लागू करे गे हे। खेल म राष्ट्रमंडल खेल के रजत पदक विजेता ज्ञानेश्वरी यादव ला डीएसपी बनाए अउ 30 लाख रुपिया देहे के घोसना करे गीस। प्रदेस म नवा तकनीक ला बढ़ावा देहे बर 500 करोड़ रुपिया के ‘एआई मिशन’ मंजूर करे गे हे।
ए मउका म मुख्यमंत्री ह ‘मेरी बेटी-मेरा अभिमान’ अभियान के सुरूआत करिन, जेकर तहत 6,671 सरकारी इस्कूल मन म बेटी मन बर संडास बनाए जाही। पर्यटन अउ कला ला बढ़ावा देहे बर चित्रकोट म टेंट सिटी, नवा रायपुर म ‘चित्रोत्पला फिल्म सिटी’ अउ ‘डॉ. तीजन बाई लोककला अलंकरण’ सुरू करे के घलो घोसना करिन।
नक्सलवाद ले मुक्त छत्तीसगढ़ अब विकास अउ खुशहाली के रद्दा म, स्वतंत्रता दिवस म मुख्यमंत्री साय ह करिन कइ ठन नवा घोषणा
