जांजगीर-चांपा, प्रधानमंत्री आवास योजना (ग्रामीण) ले गांव-घर के जरूरतमंद परिवार मन के जिनगी म बड़का बदलाव आवत हे। ए योजना के माध्यम ले गरीब अउ कमजोर परिवार मन ला सुरक्षित अउ पक्का घर देके उमन के जीवन स्तर ला सुधारे के काम करे जात हे। जांजगीर-चांपा जिला के जनपद पंचायत पामगढ़ के ग्राम पंचायत धरदेई के रहइया श्री भूपेन्द्र कुमार कर्ष के कहानी ए बदलाव के एक ठन सुग्घर मिसाल हे।
श्री भूपेन्द्र कुमार कर्ष, पिता श्री अलग राम, उमर 48 बछर, खेती-किसानी अउ मजूदरी करके अपन परिवार के गुजरा चलाथें। आर्थिक स्थिति कमजोर होय के सेती उमन कइ बछर ले अपन घरवाली, एक ठन बेटी अउ एक ठन बेटा के संग माटी अउ खपरा के कच्चा घर म रहे बर मजबूर रहिन। बरसात के दिन म छत ले पानी चुहे अउ घर के जर्जर हालत के सेती परिवार ला भारी परेशानी झेले बर परत रहिस। अइसन म परिवार बर एक ठन पक्का अउ सुरक्षित घर बनाना उमन के कइ बछर जुन्ना सपना रहिस।
प्रधानमंत्री आवास योजना (ग्रामीण) के तहत पात्रता के आधार म ग्राम पंचायत धरदेई ह साल 2024-25 म श्री भूपेन्द्र कुमार कर्ष के घर के अनुमोदन करिस। आवास पास होय के बाद सासन ले मिले किस्त के पइसा ले उमन घर बनाए के काम सुरू करिन। ग्राम पंचायत म चलत स्व-सहायता समूह मन ह सेंटरिंग सामग्री देके मदद करिन। उहें अटल डिजिटल सुविधा केंद्र संग ग्राम पंचायत के सरपंच, सचिव अउ रोजगार सहायक घलो घर बनाए म पूरा सहयोग दीन।
घर बनाए के बखत श्री कर्ष ला 90 दिन के मजदूरी राशि घलो मिलिस, जेकर से उमन ला अउ आर्थिक सहारा मिल गे। सासन के मदद, गांव के स्तर म मिले सहयोग अउ अपन खुद के मेहनत ले उमन के पक्का घर बनके तियार हो गे। आज श्री भूपेन्द्र कुमार कर्ष अपन परिवार संग सुरक्षित, सुभीता अउ सम्मानजनक जिनगी बितावत हें।
कच्चा अउ खपरैल घर ले पक्का घर तक के ये सफर श्री कर्ष के परिवार बर सिरिफ घर मिले के बात नो हे, बल्कि सुरक्षित भविस्य अउ सम्मानजनक जिनगी के नवा सुरुवात आय। पक्का छत मिले ले जिहां परिवार ला मौसम के आफत ले छुटकारा मिलिस, उहें उमन के मन म अपन भविस्य ला लेके भरोसा घलो बाढ़ गे हे।
श्री भूपेन्द्र कुमार कर्ष ह प्रधानमंत्री आवास योजना (ग्रामीण) के तहत पक्का घर देवाय बर भारत सरकार अउ राज्य सासन के आभार जतावत कहिन के उमन कभू नइ सोचे रहिन के कमती अमदानी म घलो अपन परिवार बर पक्का घर बना पाहीं। सासन के सहयोग ले उमन के कइ बछर जुन्ना सपना आज सच हो गे हे।
प्रधानमंत्री आवास योजना ले भूपेन्द्र कुमार कर्ष के पक्का घर के सपना होइस पूरा
