मुख्यमंत्री विष्णु देव साय ह करिन ‘जशपुर : एक परिचय’ किताब के विमोचन

रायपुर, मुख्यमंत्री श्री विष्णु देव साय ह भारतीय लोक प्रशासन संस्थान (IIPA) दिल्ली कोती ले प्रकाशित किताब ‘जशपुर : एक परिचय’ के विमोचन करिन। ये मौका म संस्थान के छत्तीसगढ़ शाखा के चेयरमैन अउ पूर्व मुख्य सचिव श्री सुयोग्य कुमार मिश्रा, वाइस चेयरमैन डॉ. इंदिरा मिश्रा अउ पूर्व मुख्य सचिव तथा वर्तमान राज्य निर्वाचन आयुक्त श्री अजय सिंह घलो उपस्थित रहिन।
किताब म जशपुर जिला के इतिहास, प्रशासनिक विकास, सुशासन, सामाजिक-आर्थिक बदलाव, जनजातीय संस्कृति, प्राकृतिक संपदा अउ विकास के संभावना मन के पूरा लेखा-जोखा हे। मुख्यमंत्री ह कहिन के जशपुर अपन समृद्ध प्राकृतिक अउ सांस्कृतिक धरोहर खातिर जाने जाथे। आजादी के बाद ले अब तक के प्रशासनिक अनुभव अउ विकास यात्रा ल समेटे ये किताब नीति-निर्माता, शोधार्थी, विद्यार्थी अउ प्रशासन बर एक ठन जरूरी संदर्भ ग्रंथ साबित होही।
जानबा हे के भारतीय लोक प्रशासन संस्थान ह देश के जिला मन के प्रशासनिक बदलाव अउ विकास यात्रा के दस्तावेजीकरण बर राष्ट्रीय अभियान चलाए हे। एकरे तहत छत्तीसगढ़ शाखा ह प्रदेश के 33 जिला मन ले जशपुर के चयन करिस। साल 1998 म रायगढ़ ले अलग होके बने जशपुर जिला के अलग गजेटियर नइ होय के सेती, ये किताब ल रायगढ़ गजेटियर, 2011 के जनगणना अउ जिला प्रशासन के साझा सहयोग ले तैयार करे गे हे।