रायगढ़ के राकेश पटेल के डेयरी व्यवसाय ल मिलिस नवा उड़ान, 1200 रुपिया ले सुरु होके पहुंचिस 117 मवेसी तक

CHHATTISGARHI NEWS: रायगढ़ gurturgoth, जिला के ग्राम जुर्डा के रहइया राकेश पटेल शासकीय योजना मन के लाभ लेके ग्रामीण अर्थव्यवस्था म नवा मिसाल कायम करे हें। कभू मात्र 1200 रुपिया अउ एक गाय ले घर-घर साइकिल म दूध पहुंचाए के काम सुरु करइया राकेश आज 117 मवेसी मन के बड़का डेयरी फार्म के संचालन करत हे। पशुपालन विभाग के मार्गदर्शन अउ डेयरी उद्यमिता योजना के तहत मिले 5 लाख अउ 12 लाख रुपिया के करजा ले ओ अपन व्यवसाय ल बढ़ाइस। ओखर डेयरी म आज 42 किसान परिवार मन ले रोज लगभग 300 लीटर दूध सकेले जाथे, जेकरसे किसान मन ल नियमित आमदनी मिलत हावय।
ए डेयरी फार्म के माध्यम ले गांव के 10 महिला अउ 6 युवा कुल 16 लोगन ल प्रत्यक्ष रोजगार मिल गे हावय। राकेश पटेल अपन डेयरी गतिविधि ल पर्यावरण संरक्षण ले भी जोड़े हे, जईसे वो ह किसान मन ले पैरा सकेल के पशु चारा के रूप म उपयोग करथे अउ ओखर बदला म किसन मन ल गोबर देथे। ए प्रकार राकेश पटेल के मेहनत अउ शासकीय योजना के सहयोग ले आज ओखर जिनगी के संगे-संग आसपास के ग्रामीण मन के भी आर्थिक स्थिति मजबूत होगे हावय अउ ओमन दूसर मन बर प्रेरणा बनगे हें।