पीएम विश्वकर्मा योजना ले चिरमिरी के शालू काशी बनिस स्वावलंबी, सिलाई मशीन ले बदल गे जिनगी

CHHATTISGARHI NEWS: मनेंद्रगढ़-चिरमिरी-भरतपुर (MCB), प्रधानमंत्री विश्वकर्मा योजना देश भर के पारंपरिक कारीगर मन अउ हुनरमंद महिला मन बर वरदान साबित होत हवय, जेकर से लोगन मन ल रोजगार के नवा साधन मिलत हे अउ उंखर आर्थिक स्थिति सुधरत हवय। इही कड़ी म छत्तीसगढ़ के चिरमिरी क्षेत्र के रहइया शालू काशी के जिनगी म घलो प्रधानमंत्री विश्वकर्मा योजना ले एक बड़े सकारात्मक बदलाव आए हवय। शालू काशी ल ए योजना के तहत सिलाई मशीन मिले हवय, जेकर से वोहा अपन घर बइठेच सिलाई के काम शुरू करके आत्मनिर्भर बनगे हवय।
पहिली शालू काशी ल आर्थिक तंगी अउ कई किसिम के पारिवारिक चुनौती मन के सामना करे बर परत रहिस। परिवार के गुजारा करे अउ घर के खर्चा चलाए बर कइ प्रकार के परेशानी होवत रहिस, काबर के आमदनी के कोनो निश्चित जरिया नइ रहिस। फेर जब उनला प्रधानमंत्री विश्वकर्मा योजना के बारे म पता चलिस, त वोहा ए योजना बर आवेदन करिस। योजना के तहत मिले व्यवस्थित ट्रेनिंग अउ सिलाई मशीन से वोखर जिनगी बदलगे। अब वोहा घरेच म कपड़ा सिलाई के काम करके बढ़िया आमदनी कमावत हवय।
सिलाई के काम शुरू होए के बाद आसपास के ग्रामीण महिला मन अउ लोगन मन कपड़ा सिलाई बर शालू के घर आए लगे हवंय। एखर से शालू ल नियमित रूप ले काम अउ आय मिलत हवय। अब वोला कोनो दूसर ऊपर निर्भर रहे के जरूरत नइ पड़े। अपन मेहनत अउ लगन के बल बूता म शालू काशी आज एक सफल महिला उद्यमी के रूप म अपन पहचान बनावत हवय।
ए सफलता खातिर शालू काशी प्रधानमंत्री नरेंद्र मोदी अउ शासन के प्रति आभार व्यक्त करत हवय। वोकर कहना हवय के ए योजना न सिर्फ वोला आर्थिक रूप ले मजबूत करे हवय, बल्कि समाज म सम्मान के साथ जिए के रद्दा घलो देखाए हवय। शालू काशी के ए कहानी छत्तीसगढ़ के दूसर महिला मन बर घलो प्रेरणा के स्रोत बनगे हवय।