CHHATTISGARHI NEWS:गौरेला-पेन्ड्रा-मरवाही, छत्तीसगढ़ सरकार के जनहितैषी अउ कल्याणकारी योजना मन ग्रामीण इलाका के गरीब मनखे मन के जिनगी म ऐतिहासिक बदलाव लावत हवय। इही कड़ी म प्रधानमंत्री आवास योजना ग्रामीण इलाका के बेघर अउ गरीब परिवार मन बर बहुत बड़ा संबल बनगे हवय। राज्य के ग्रामीण क्षेत्र मन म रहइया सरिता बैगा के जिनगी म घलो ए योजना के सेती एक नवा बिहान आए हवय, अउ अब वोखर घर म बरखा के पानी चूहे के बजाय खुसियाली बगरथे।
पहिली सरिता बैगा के परिवार ला एक पक्का छत नइ होने के सेती कइ किसिम के भारी परेशानी के सामना करे बर परत रहिस। कच्चा अउ जर्जर घर होए के सेती बरसात के दिन म पानी चूहय, जेकर से जिनगी बिताना बहुत मुसकिल होवत रहिस। आर्थिक स्थिति कमजोर होए के सेती पक्का मकान बनवाए के सपना सिर्फ सपना ही बनके रहिगे रहिस। फेर जब उनला प्रधानमंत्री आवास योजना के लाभ मिलिस, तब वोखर पक्का मकान बनाए के सपना पूरा होइस।
योजना के तहत मिली आर्थिक सहायता अउ किस्त के मदद ले सरिता के परिवार अपन खुद के एक सुंदर पक्का मकान बना लिस। अब पक्का घर मिल जाए के बाद से बरसात के दिन म होवइया परेशानी हमेशा बर खत्म होगे हवय। परिवार सुरक्षित माहौल म चैन के सांस लेत हवय अउ लइका मन के पढ़ाई-लिखाई भी सुग्घर ढंग से होवत हवय।
सरिता बैगा के ए सफलता के कहानी ये बताथे के सरकारी योजना मन के सही क्रियान्वयन ले गरीब मनखे मन के जीवन स्तर म कतका सुग्घर सुधार हो सकथे। प्रधानमंत्री आवास योजना ग्रामीण परिवार मन ल न सिर्फ एक सुरक्षित छत देवत हवय, बल्कि उनला समाज म सम्मानजनक जीवन जिए के ताकत घलो प्रदान करत हवय, जेकर से पूरा क्षेत्र के मनखे मन म खुसियाली छाय हवय।
अब बरखा नइ खुसी बरसथे सरिता बैगा के दुआर म, आवास योजना ले बदलगे जिनगी
