CHHATTISGARHI NEWS: बालोद, सेवा संकल्प अभियान के अंतर्गत स्वास्थ्य योजना मन के लाभ जरूरतमंद परिवार मन तक पहुंचत हे। बालोद जिला के गुंडरदेही विकासखंड के रहइया श्रीमती जमुना बाई बर आयुष्मान भारत प्रधानमंत्री जन आरोग्य योजना ह राहत के सहारा बनगे हे। लंबा समय ले माड़ी के पीरा ले परेसान जमुना बाई के बालोद जिला अस्पताल मं निःशुल्क ऑपरेशन करे गीस। ऑपरेशन के दू दिन बादेच वो ह वॉकर के सहारा ले के चलना घलो सुरू कर देहे हे।
माडी़ के पीरा के मारे श्रीमती जमुना बाई ल उठना-बइठना, चलना-फिरना अउ घर के सामान्य काम करे मं घलो बहुत कठिनाई होत रहिस। परिवार बर कोनो निजी अस्पताल मं इलाज के खरचा उठाना घलो बहुत कठिन रहिस। जब पीरा बाढ़गे, त वो ह जिला अस्पताल बालोद पहुंचिस। उहाँ चिकित्सक मन जाँच, एक्स-रे अउ जरूरी परीक्षण कर के ऑपरेशन के सलाह दीन। इलाज के प्रक्रिया समझ के परिवार के सहमति ले वोकर ऑपरेशन करे गीस। आयुष्मान कार्ड के माध्यम ले निःशुल्क इलाज मिले ले परिवार ल बहुत बड़े आर्थिक राहत मिलिस। ऑपरेशन के बाद चिकित्सक अउ नर्सिंग स्टाफ मन श्रीमती जमुना बाई के पूरा देखरेख करिन। ए योजना के तहत गरीब अउ जरूरतमंद मरीज मन ल बेहतरीन स्वास्थ्य सुविधा मिलत हे, जेकर से ओमन ल जीवन मं नवा आस मिले हे।
आयुष्मान योजना ले जमुना बाई ल मिलिस माड़ी पीरा ले आराम, बालोद जिला अस्पताल मं होइस निःशुल्क ऑपरेशन
