चिरायु योजना ले 12 बछर के तरुना ल मिलिस नवा जीवन, जन्मजात गंभीर बीमारी ले मिलिस मुक्ति

CHHATTISGARHI NEWS: महासमुंद, छत्तीसगढ़ शासन के महत्वपूर्ण स्वास्थ्य योजना मन कइ परिवार बर आसा के किरण साबित होत हे। इही कड़ी मं राष्ट्रीय बाल स्वास्थ्य कार्यक्रम मने चिरायु योजना ह 12 बछर के बालिका तरुना बर जीवनदान बन के आए हे। जन्मजात गंभीर स्वास्थ्य समस्या ले जूझात तरुना के सफल उपचार के बाद अब ओखर जिनगी मं एक नवा खुसी अउ भरोसा जागे हे। परिवार के आर्थिक स्थिति कमजोर होय के सेती अतना बड़े इलाज के खरचा उठाना संभव नइ रहिस, फेर शासन के मदद ले ए सब बात संभव होइस।
मिले जानकारी के मुताबिक, महासमुंद विकासखंड बागबाहरा के शासकीय पूर्व माध्यमिक शाला भानपुर के कक्षा 7वीं म पढ़त कुमारी तरुणा यादव ल जन्मजात बीमारी के सेती शारीरिक कष्ट अउ गंभीर परेशानी के सामना करना परत रहिस। चिरयु योजना के टीम जब स्कूल अउ क्षेत्र के स्वास्थ्य जाँच करिस, त ओखर बीमारी के पहचान होइस। चिरायु योजना के अंतर्गत विशेषज्ञ चिकित्सक मन के देखरेख मं बालिका के बने इलाज अउ जरूरी ऑपरेशन के प्रक्रिया पूरा करे गीस। इलाज के पूरा खरचा सरकार डहर ले उठाय गीस, जेकर से परिवार ल राहत मिलिस। सफल इलाज के बाद अब तरुना पूरा स्वस्थ महसूस करत हे अउ ओखर चेहरा के मुस्कान ल देख के परिवार वाले मन गदगद हें। ग्रामीण अउ गरीब परिवार मन बर चलत ए योजना मन सिरतोन म बरदान साबित होत हें। स्वास्थ्य विभाग अउ चिरायु योजना के अमला के समूचा क्षेत्र मं सराहना होवत हे। ए योजना के बदौलत आज कइयो लइका मन ल नवा जिनगी मिलत हे अउ ओमन अपन सपना ल पूरा करे के रद्दा म आगू बढ़त हें।