सेवा संकल्प अभियान: कुदरीडीह के स्वच्छाग्राही दीदी मन के कचरा ले होइस कमई, बेचिन 650 किलो कचरा

CHHATTISGARHI NEWS: अम्बिकापुर, छत्तीसगढ़ म चलत ‘सेवा संकल्प अभियान’ ह ग्रामीण इलाकामन म स्वच्छता अऊ आत्मनिर्भरता के एक बढ़िया उदीम करत हे। इही कड़ी म मैनपाट विकास खंड के कुदरीडीह गांव के स्वच्छाग्राही दीदीमन कचरा प्रबंधन के काम म जुटके एक नवा मिसाल कायम करे हें। गाँव म घर-घर जाके कचरा सकेले, फेर ओखर बाद सेग्रीगेशन शेड म लाके ओखर छंटई-निमरई करे जाथे। ए काम म बेंचाए जा सकय तइसे अऊ उपयोगी समान मन ल बेकार कचरा ले अलग करे जाथे। उहें व्यवस्थित ढंग ले छंटाई करे के बाद दीदीमन ह अब तक कुल 650 किलोग्राम कचरा ल बेच डरे हें, जेखर से ओमन ल बढ़िया आमदनी घलो होए हे। ए पहल ले सिरिफ गाँव म कचरा के व्यवस्थित प्रबंधन ही नइ होवत हे, बल्कि पूरा गाँव ल साफ-सुथरा रखे म घलो मदद मिलत हे।
गांव म कचरा अब बेकार नइ रइगे हे, बल्कि ओखर सही उपयोग होवैया संसाधन बन गे हे। ‘सेवा संकल्प अभियान’ के तहत कुदरीडीह के ए सेवा के कहानी स्वच्छता, सामुदायिक सहभागिता अऊ कचरा ले कमाई के संभावना के एक जीवंत उदाहरण बन गे हे। स्वेच्छाग्राही दीदीमन के ए निष्ठावान अऊ समर्पित प्रयास ले गाँव म कचरा प्रबंधन के व्यवस्था अड़बड़ मजबूत होवत हे। ओमन के ए मेहनत के बदौलत गाँव के महतारी-बहिनी मन आर्थिक रूप ले घलो आघू बढ़त हें अऊ आत्मनिर्भर होवत हें। ए प्रकार के रचनात्मक अऊ उपयोगी पहल ले गाँव-गाँव म स्वच्छता के प्रति जागरूकता सरलग बाढ़त हे, अऊ ग्रामीण इलाकामन म विकास के नई दिशा मिलत हे। कुदरीडीह के ए दीदीमन के काम पूरा प्रदेश भर के स्व सहायता समूह बर प्रेरणादायक बन गे हे, जे ह साफ़-सुथरा अऊ स्वस्थ समाज के निर्माण म मददगार साबित होवत हे।