‘सेवा संकल्प अभियान’: मुख्यमंत्री ग्रामीण बस योजना ले अमोली गांव के मनखे मन बर आसान होइस बजार आना-जाना, आधा होइस किराया

CHHATTISGARHI NEWS: सरगुजा, जिला के कल्याणपुर क्षेत्र म शासन के ‘सेवा संकल्प अभियान’ अउ ‘मुख्यमंत्री ग्रामीण बस योजना’ गांव वाले मन बर बड़का राहत ले के आए हे। ए योजना कइसे आम मनखे अउ किसान मन के जिनगी ल सुगम बनाए हे, एकर सुंदर उदाहरण अमोली गाँव के बासिंदा मन के अनुभव ले देखे ल मिलथे। पहिली अमोली गाँव ले कृषि उपज मंडी आना-जाना करे बर गांव वाले मन ल महँगा किराया देहे बर परत रहिस, जेकर सेती ओ मन ल आर्थिक बोझा के सामना करे बर परत रहिस। फेर अब मुख्यमंत्री ग्रामीण बस योजना के तहत बस सेवा शुरू हो जाए के बाद ले ग्रामीण मन के आना-जाना न केवल आसान हो गे हे, बल्कि किराया घलो आधा हो गे हे।
गाँव के मनखे मन बताइन के पहिली परिवहन के साधन सीमित होए के सेती मंडी अउ बाजार पहुंचे बर बड़ परेसानी होवत रहिस अउ निजी साधन या महँगी गाड़ी के भरोसा रहे बर परत रहिस। अब कम किराया म नियमित बस सुविधा मिल जाए के सेती किसान मन अपन उपज ल सही समय म मंडी ले जाके बेच पावत हवंय, अउ संगेच जरूरी सामान मन के खरीदी करके सुघर ढंग से घर लहुटत हवंय। शासन के ए जनकल्याणकारी पहल अउ सेवा संकल्प अभियान के सेती ग्रामीण क्षेत्र मन म यातायात व्यवस्था सुधरे हे, जेकर से आम नागरिक मन म खुशियाली छा गे हे अउ ओ मन शासन-प्रशासन के प्रति अपन गहरा संतोष व्यक्त करत हवंय।