CHHATTISGARHI NEWS: मोहला-मानपुर-अम्बागढ़ चौकी, जिला के ग्राम पंचायत चमाराटोला निवासी श्री सुकलु राम निषाद के परिवार बर कभू बारिश के बूंद दूख अउ चिंता ले के आवत रहिस। माटी अउ खपरा ले बने कच्चा मकान के छत ले चूहत पानी, ओद्दा भिथिया अउ हर साल मरम्मत के परेशानी परिवार के जिनगी के हिस्सा बन चुके रहिस। अब तस्वीर बदल गए हे अउ प्रधानमंत्री आवास योजना ले मिले पक्का मकान ह परिवार ला कइ बछर के चिंता ले मुक्ति दे के सुरक्षित अउ सुकून भरे जिनगी देहे हे।
सीमित आर्थिक संसाधन के सेती पक्का मकान बनाना सुकलु राम बर आसान नइ रहिस। बरसात म छत ले पानी टपके ले परिवार ला घर के सामान ला सुरक्षित रखे के चिंता सतावत रहय। अब प्रधानमंत्री आवास योजना के तहत ओखर आवास पास होय के बाद ओखर कइ बछर के जुन्ना सपना साकार होगे हे। पक्का मकान बन के तियार होय के बाद अब परिवार ला हर मौसम म सुरक्षित छत के भरोसा मिले हे।
श्री सुकलु राम बताथे के पहिली बरसात सुरू होतेच पूरा परिवार के चिंता बाढ़ जात रहिस। अब पक्का घर मिले के बाद परिवार बेफिक्र होके राहत के सांस लेत हे। सुरक्षित आवास मिले ले परिवार के जिनगी म सुकून के संग आत्मविश्वास घलो बाढ़े हे। प्रधानमंत्री आवास योजना ले मिले ये घर सिरिफ ईंटा अउ सीमेंट से बने मकान नो हे, बल्कि कइ बछर के संघर्ष ले मिले राहत अउ बेहतर भविष्य के मजबूत नेंव ये।
श्री सुकलु राम निषाद ह पक्का आवास मिले म प्रधानमंत्री श्री नरेंद्र मोदी अउ मुख्यमंत्री श्री विष्णु देव साय के प्रति आभार व्यक्त करत कहिस के शासन के ये योजना ओखर परिवार के सपना ला पूरा कर देहे हे।
सुकलु राम के पक्का घर के सपना होईस साकार, बरसा म छांधी चूहे अउ भिथिया ओदरे के डर ले मिलिस मुक्ति
