टोनही कहिके प्रताड़ित करइया मन के खिलाफ मामला दर्ज

आरंग, 7 अक्टूबर 2020। आरंग थाना क्षेत्र के ग्राम देवरी (गुल्लू) म महिला ल टोनही कहिके ग़ालीगलौच करके प्रताड़ित करइया के मामला आगु आय हे। ये घटना म आरंग पुलिस ह अपराध दर्ज करके आरोपी के खिलाफ कार्रवाई करत हे। मामला म ग्राम देवरी के गीताबाई यादव (60) ह आरोपी के खिलाफ कार्रवाई करे बर आरंग पुलिस ले लिखित म शिकायत करे हे। पीड़िता ह शिकायत म कहिन कि घर के साफ-सफाई करत रिहिस। उही बेरा म छत के टीन ले कुछ पानी भुइया म गिर गे। एखर बाद पड़ोसी ह टोनही कहिके जान ले मारे के धमकी देवन लगीस। पीड़िता के अनुसार ओहा पहली घलो टोनही कहिके ओखर ऊपर लांछन लगात रिहिस। मामला ल गंभीरता ले लेवत हुए आरंग पुलिस ह आरोपी के खिलाफ आईपीसी के धारा 294, 506, 34 अउ टोनही प्रताड़ना अधिनियम के धारा 4 के तहत अपराध दर्जकर कार्रवाई करे जावत रिहिस।