बालोद, 06 जून 2020। डौंडी के दुर्गा चौक म आज तड़का बिहनिया एक किराना के दुकान म आगी लग गे. देखत ही देखत कुछ देर म आगी भीषण होगे. भयावह होवत आगी ह दुकान ले लगे घर ल अपन चपेट म ले लिस. घर वाला मन भाग के कुरिया ले बाहिर आइस. घर के भीतर आगी के प्रवेश होवत ही पूरा तरह ले फैल गे. रसोई म रखे चार सिलेंडर म दू आगी के चपेट म आके एक-एक कर फटगे. दू सिलेंडर के फटत ही आग ह विकराल रूप ले लिस. घर अउ दुकान अब पूरा तरह ले आगी के चपेट म आ चुके हे.
घटना के जानकारी स्थानीय पुलिस अउ दमकल विभाग ल मिलिस. पुलिस के टीम के कुछ देर बाद दमकलकर्मी घलो पहुँचगे. 9.30 बजे तक आगी म काबू नई पाये जा सके रहिस. किराना दुकान, मकान अउ गोदाम एक संग लगे होय के सेती आगी के फैलाव हो चुके हे. किराना दुकान संचालक मदन जैन के अनुसार लगभग 50 लाख के समान जल के खाक हो चुके हे. आगी कइसे लगिस अभी तक एखर पता नई हे. पुलिस ह मामला के जांच करत हे.