छत्तीसगढ़ राज्य स्थापना के रजत जयंती बछर म विशेष कार्यक्रम मन के लड़ी
रायपुर, छत्तीसगढ़ पर्यटन बोर्ड ह राज्य स्थापना के रजत जयंती बछर (25वां साल) के खुसी म 8 दिसंबर ले 21 दिसंबर 2025 तक विशेष कार्यक्रम अउ प्रतियोगिता मन के बड़का लड़ी आयोजित करत हे। प्रदेश के अलग-अलग पर्यटन केंद्र, रिसॉर्ट अउ पर्यटन बोर्ड के मुख्य दफ्तर रायपुर म नवा-नवा कार्यक्रम मन के दौर चलत हे। ए सबो के मुख्य उद्देश्य छत्तीसगढ़ पर्यटन ल नवा ऊँचाई म पहुँचाना हे।
इही कड़ी म पर्यटन बोर्ड ह 19 दिसंबर 2025 के सरगुजा जिला के मैनपाट म बने करमा रिसॉर्ट म लोकनृत्य प्रतियोगिता के आयोजन करे जात हे। ए प्रतियोगिता म जेकर पहिला नंबर आही (प्रथम स्थान) ओला 7 हजार रूपिया नगद, दूसरा नंबर वाला ल 5 हजार रूपिया अउ तीसरा नंबर वाला ल 3 हजार रूपिया नगद इनाम देहे जाही। सबो जितइया मन ल प्रमाणपत्र घलो भेंट करे जाही।
प्रचार सामग्री म जगा अउ बड़े पहिचान के मौका
प्रतियोगिता के बखत खिंचे गए फोटो अउ वीडियो मन ल छत्तीसगढ़ पर्यटन बोर्ड के प्रचार सामग्री अउ डिजिटल प्लेटफॉर्म म प्रमुखता ले जगा दे जाही। एकर ले भाग लेवइया मन ल राष्ट्रीय स्तर म पहिचान पाय के सुग्घर मौका मिलही। ए आयोजन ले न सिरिफ स्थानीय पर्यटन ल बढ़ावा मिलही, भलुक युवा मन म लोककला बर उत्साह घलो जागही। पर्यटन बोर्ड ह राज्य के युवा मन, पर्यटक मन अउ आम नागरिक मन ले जादा से जादा संख्या म सामिल होय के अरजी करे हे। जादा जानकारी बर +91-93991-61360 नंबर म फोन करे जा सकत हे।