महासमुन्द, 10 जून 2020। जिला के सिंघोडा थाना पुलिस ह बुधवार के एक करोड़ 12 लाख 99 हजार 200 रुपिया कार के गुप्त बने डिक्की ले बरामद करे हे. एमा दू ओडिसा निवासी प्रतीक छापड़िया पिता गोविंद प्रसाद छापड़िया 30 साल, सुरेंद्र सोना पिता दवारुं सोना 28 साल ल गिरफ्तार कर धारा 102 के तहत कारवाई करके एसआईटी ल मामला सौंप दे हे. महासमुन्द पुलिस अधीक्षक प्रफुल्ल ठाकुर ह बताइस कि 8 अउ 9 जून के दरम्यानी रात साढ़े 12 बजे के आसपास रेहटी खोल रोड म चेकिंग के बेरा वाहन क्रमांक ओआर 17 के 5052 म सवार दू व्यक्ति बरगढ़ ओडिसा के डहर ले आवत रहिस, जोन ल सिंघोड़ा पुलिस ह वाहन म गांजा होय के शंका म वो वाहन ल रुकवा के वाहन के पीछू डिक्की ल चेक करिस. पुलिस ल डिक्की के अंदर एक गुप्त डिक्की नजर आइस, जोन ल पुलिस ह खोलिस तब पुलिस ल ये जानकारी मिलिस की वाहन म बेनामी करोड़ों रुपिया अवैध रूप ले ओडिसा ले रायपुर परिवहन करे जावत रहिस.
पुलिस ह वो रकम ल बरामद करके जब ओखर गिनती करिस त एक करोड़, 12 लाख 99 हजार 200 रुपिया निकलिस. एमा 500, 200 अउ 2000 के नोट मिले हे. गिरफ्तार आरोपी मन ह पुलिस ल ये जानकारी दीन हे कि ओडिसा ले रायपुर कोनो व्यापारी ल दे बर जावत रहेन, वाहन म सवार दुनो व्यक्ति मन ल रकम कोन ल देना हे एखर जानकारी नई रहिस. महासमुन्द पुलिस ह धारा 102 के तहत कार्रवाई करत मामला एसआईटी रायपुर ल सौंप दे हे.
